InfoHub Logo

Qazaqstan Respýblıkasynyń Prezıdenti Qasym-Jomart Toqaev elimizdegi barsha musylmandardy Qurban aıt merekesimen quttyqtady. Bul týraly Aqordanyń baspasóz qyzmeti habarlady.

Memleket basshysynyń quttyqtaý hatynda aıtylǵandaı, Qurban aıt musylman áleminde erekshe oryn alatyn, zor yqylaspen kútiletin mereke.

«Bul mereke meıirimdilikke, janashyrlyqqa, rýhanı kemeldenýge, ózara qurmet pen senimge, yntymaqqa shaqyrady. Qurban aıttyń qasıetti kúnderi bir-birimizge qoldaý kórsetýdiń, aǵa býyndy qadirleýdiń, eldiń ıgiligi jolyndaǵy ortaq jaýapkershiliktiń mańyzdylyǵyn eske salady. Bul – ádildikke, taza nıetke, gýmanızmge negizdelgen ıslamdy tereń túsiný men sanaly túrde qabyldaý kezeńi», - delingen hatta.

Prezıdent óz sózinde ıslamnyń jáne basqa da dástúrli dinderdiń progresıvti qundylyqtarynyń halqymyzdyń rýhanı damýyna, urpaqtar sabaqtastyǵyna, qoǵamdaǵy birlik pen kelisimge berik negiz bolatynyn atap ótti.

«Biz úshin Otannyń egemendigi men táýelsizdiginen asqan eshteńe joq. Konstıtýsıa – halqymyzdyń kúndelikti ómiriniń aınasy, bizdiń biregeıligimizdiń ózegi. Sondyqtan ulttyq birlikti nyǵaıtý, etnosaralyq jáne konfesıaaralyq kelisimdi qamtamasyz etý – memlekettik saıasattyń myzǵymas basymdyǵy jáne asa mańyzdy konstıtýsıalyq mindet», - dedi Qasym-Jomart Toqaev.

Memleket basshysy eldegi turaqtylyq pen úılesimdilikti saqtaý árbir azamattyń paryzy ekenin aıtyp, jahandyq syn-qaterlerge toly qazirgi kezeńde bul – Otanymyzdyń odan ári órkendeýiniń negizi, Ádiletti, Progresıvti Qazaqstandy qurýdyń basty sharty ekenin basa aıtty.

«Birlik pen jasampazdyq patrıotızminde bizdiń basty kúshimiz bar ekenine senimdimin. Barsha otandastaryma zor densaýlyq, baqyt jáne ıgilik tileımin! Qurban aıt merekesi qutty bolsyn!» - dep túıindedi Prezıdent.