InfoHub Logo

Aıtysker aqyn Muhamedjan Tazabek jýrnalıs Janar Baısemizdiń YouTube arnasyndaǵy suhbatynda Qazaqstannyń tuńǵysh prezıdenti Nursultan Nazarbaevqa qatysty pikirin bildirdi.

Bul týraly Infohub.kz aqparat agenttigi habarlaıdy.

Aqynnyń aıtýynsha, onyń kózqarasy belgili bir tulǵalarǵa emes, jalpy bılik júıesindegi qundylyqtar men basqarý mádenıetine baǵyttalǵan. Ol Nazarbaevqa, Toqaevqa nemese basqa da bılik basyndaǵylarǵa emes, bıliktiń jalpy qundylyqtaryna nazar aýdaratynyn atap ótti.

Tuńǵysh prezıdentke degen úmit

Tazabek «Tuńǵysh prezıdent» uǵymyn otbasyndaǵy tuńǵysh balamen salystyrdy. Onyń paıymynsha, otbasyndaǵy tuńǵysh balaǵa erekshe úmit artylatyny sekildi, eldiń alǵashqy basshysyna da keń múmkindik pen aıryqsha ókilettik berilgen.

Aqynnyń oıynsha, sol kezeńde bılik bir ortalyqqa shoǵyrlanyp, mańyzdy sheshimder kóbine bir júıeniń aınalasynda qabyldandy. Degenmen, ol ótken dáýirdegi qatelikterdi tek bir adamnyń atymen baılanystyrýdy ádiletsiz dep sanaıdy.

Qatelikterdi saralaý

«Nazarbaevtyń ózi de kadr máselesinde de, basqa sheshimderde de qatelikter bolǵanyn moıyndaǵan. Keńestik tapshylyqtan keıin halyq molshylyqqa umtyldy. Bul bir adamnyń ǵana áreketi emes, tutas qoǵamnyń talpynysy edi», – dedi Muhamedjan Tazabek.

Onyń aıtýynsha, 90-jyldar men ótpeli kezeńde qoǵamda árkim óz múddesin kúıttegen jaǵdaılar kóp boldy. Keıbir yqpaldy azamattar men sheneýnikter memleket múlkine jeke menshigindeı qarady.

Tazabek bılik júıesindegi kemshilikterdi túsiný úshin jeke tulǵalardy ǵana emes, sol ortany qalyptastyrǵan qoǵamdyq sana men qundylyqtardy da saralaý qajet ekenin aıtty.

«Qatelikterdi bir adamǵa ǵana tańý durys emes. Patshanyń janyndaǵylar da sol ortany qalyptastyrady. Tómen oılaıtyndar adamdardy talqylaıdy, ortasha oılaıtyndar oqıǵalardy sóz etedi, al joǵary oılaıtyndar qundylyqtardy saralaıdy deıdi. Sondyqtan men barynsha qundylyq turǵysynan oılaýǵa tyrysamyn», – dedi aqyn.

Osylaısha, Muhamedjan Tazabek Nazarbaev kezeńine baǵa bergende emosıaǵa berilmeı, sol dáýirdegi qoǵamdyq ahýal men bılik mádenıetine nazar aýdarý kerek degen oıyn jetkizdi.