InfoHub Logo

Qurmanǵazy Oral túrmesinde jatyp qalady. Bul túrmeniń orda túrmesindeı emes, myqty ekenin kórip, Qurmanǵazy bira nalıdy. Birneshe kún eshkimmen keńespeı, ózimen-ózi bolyp, qalyń ýaıym teńizine batady. Bir kúni qysqa serýen kezinde Lavochkın degen orys tutqynymen tanysady. Ol «aq patshaǵa tili tıgeni úshin» qamalǵan orys jumyskeri bolyp shyǵady. Ózi qazaq arasynda kóp bolyp, qazaqshany sýdaı biletin bolady. Ol Qurmanǵazyny jubatyp, kóptegen aqyl aıtyp, óziniń ómirinen biraz shejire aıtady. Ekeýi endi aıyrylmas dos bolyp, syrlasyp, aqyldasyp otyratyn bolady.

Qurmanǵazy Lavochkınge óziniń osy jolǵa shyǵardaǵy basynan keshken bir áńgimesin baıandap beredi:

«Aqbaevtiń atarman-shabarmandary ustap alyp, kók arbaǵa tirkep, endi júrgizeıin dep turǵanda sheshem Alqa kele jatqanyn kórdim. Álpeshtep ósirgen anama áli kúnge bir qyzmet ete almaı, ony únemi qaýip-qaterde, joqshylyqta ustap kelgenmin. Endi, mine, kóp jyldan soń kelgende taǵy da ony pushaıman etip ketip bara jatqanym oıyma túsip, shydaı almaı kózimnen bir tamshy jas shyǵyp ketti. Sonda, qaıran sheshem meniń qasyma kelip: «Men ul taptym dep júrsem, jaman, jasyq neme eken ǵoı, týǵanym. Kimniń aldynda kózińniń jasyn shyǵaryp
tursyń?!» dep jaǵymnan shapalaqpen tartyp-tartyp jiberdi. Sonda ǵana men antektik jasaǵanymdy sezdim. Anama kúle qarap qosh aıtystym», — deıdi.

Qurmanǵazynyń bul áńgimesi Lavochkınge úlken áser etedi. Ol óziniń sheshesiniń talaı meıirbandy isterin esine alyp, biraz áńgime etedi. Qurmanǵazy bolsa sheshesiniń jas kezinde qandaı sotqarlyǵy bolsa da keshirip, qandaı tentektigi bolsa da Saǵyrbaıdan arashalap, qalaı da Qurmanǵazyny qaqpaılamaı, bir-betkeı etip ósirýge tyrysqanyn, ondaı tárbıeniń Qurmanǵazy ómirinde úlken ról oınaǵanyn kúıshi qaıta-qaıta esine túsirip, nebir erkelikterin kóz aldyna elestetip, kórer tańdy kózimen atyrady. Qatar jatqan Lavochkın de ózimen-ózi syrlasyp, ol da aýnaqshyp uıyqtaı almaı shyǵady.

Erteńinde Qurmanǵazy oılanyp-tolǵanyp, qolyna dombyrasyn alyp, qoly hat bilmese de, ardaqty anasynyń aıta qalǵandaı «jazasyn» qaǵaz betine túsiretin múmkinshiligi bolmasa da, dombyranyń qos isheginde bir eskertkish qaldyraıyn dep kúı shertti. Ony lavochkınge tartyp bergende ekeýiniń erligi de bir sát keıingi pylanǵa shyǵa turyp, kishkene kóz jastaryn tógip aldy. Biraq ómirdiń nebir ótkel bermes asýlaryn, asqar belderinen ótken qaıratty jigitter tez ózderin-ózderi jınap alyp, kúıdi qaıta-qaıta oryndap, tyńdap, onyń ishinde tek saǵynysh notalary ǵana emes, kúsh-qýat baryn, tipti sartyldap qashyp bara jatqan attyń tuıaǵynyń saryny baryn estigende, birin-biri tilsiz túsinip, ol sarynnyń arman daýsy ekenin bilip qoıdy. Aqyldasyp kelip kúıdiń aty «Qaıran sheshem» boldy.

---