InfoHub Logo

Qazaqstan mektepterinde oqýshylardyń bilimin baǵalaý tásilderi ózgerýi múmkin. Qazirgi tańda Oqý-aǵartý mınıstrligi biryńǵaı jıyntyq baǵalaý (BJB) men toqsandyq jıyntyq baǵalaý (TJB) júıesin muqıat zerttep jatyr. Bul jańalyq oqýshylar men muǵalimder úshin qandaı ózgerister ákeledi degen saýal týyndaýda.

Bul týraly Infohub.kz aqparat agenttigi habarlaıdy.

Oqý-aǵartý mınıstri Juldyz Súleımenovanyń aıtýynsha, vedomstvo qazirgi baǵalaý ádisterin kezeń-kezeńimen qaıta qaraýdy josparlap otyr. Orta bilim komıteti barlyq synyptardaǵy tapsyrmalar men oqýshylardyń jaýaptaryna saraptama jasap, BJB men TJB-nyń bilim deńgeıine, muǵalimniń jumysyna jáne jalpy oqý prosesine áserin anyqtaýda.

Dástúrli baǵalaý túrleri qaıta engizile me?

Mınıstrdiń sózinshe, krıterıaldy baǵalaý júıesi bilim berý standartyna engizilgenimen, dástúrli jazba jumystaryn oqý prosesinde keńirek qoldanýǵa múmkindik bar. Bul degenimiz, mektepterde burynnan qoldanylyp kelgen dıktant, mazmundama, shyǵarma jáne baqylaý jumystary sıaqty baǵalaý túrleri qaıta engizilýi múmkin.

«Birtindep BJB men TJB-dan alystaımyz dep oılaımyz. Biraq ol úshin naqty negiz ben jan-jaqty saraptama qajet», – dedi Juldyz Súleımenova.

Mınıstrlik bul ózgeristerdi birden engizýdi kózdep otyrǵan joq. Aldymen qoldanystaǵy júıeniń tıimdiligi jan-jaqty zerttelmek. Sebebi BJB men TJB birneshe jyldan beri mektep tájirıbesinde qoldanylyp keledi. Ony ózgertý muǵalimderdiń jumysyna da, oqýshylardyń oqý prosesine de tikeleı áser etetini belgili.