InfoHub Logo

Qurmanǵazy men Lavochkın sol túni túrmeden qashyp ketedi. Aınalany sharlap tastaǵan. Kúıshi nebir jyra-jyqpyldy taýyp, sátte-aq qaralaryn kórsetpeı alystap ketedi. Onyń ústine járdemdesken kúzetshi de quǵynshylardyń mańdaıyn basqa jaqqa buryp jiberip, bularǵa biraz ýaqyt utqyzady. Ien dalaǵa shyqqan soń, bular erkinirek júredi. Bir kún, bir tún júrip, tań ata Lavochkınniń bir tanys balyqshysynyń úıine kelip dem alyp, tamaqtanady. Birneshe kún tynyqqan soń, Qurmanǵazy túrme dosyna óziniń eline qaıtý kerektigin, onda qalǵan ata-ananyń hal-jaıyn bilý kerektigin aıtady. Lavochkın qımas dosymen aıyrylýdyń kerek ekenin bilse de, biraz ýaqyt taǵy otyryp áńgimelesedi. Qurmanǵazy qolyna dombyrasyn alyp, taǵy bir kúı shertedi. Ol kúıdiń burynǵy ózi estip júrgen kúılerge uqsamaıtynyn, kúıshiniń taǵy bir shyǵarmashylyq jańalyǵy ekenin Lavochkın sezedi de, eshnárse demeı tyńdap, úlken oıǵa batyp otyra beredi. Kúıdi aıaqtaǵan soń, Qurmanǵazy Lavochkınge qarap: «Ananyń bári de — ana, qaı tilde sóılese de, olardyń balaǵa degen meıirbandyqtarynyń tili árkimge de túsinikti, myna meniń jalpyǵa tili túsinikti kúıimdi sol orys anaǵa — Laýishkenge arnaımyn», — deıdi. Qurmanǵazynyń «v», «ch» dybystaryna tili kele bermeıtin. Sondyqtan kúıshiniń ózi aıtqandaı, halyq arasynda bul kúı «Laýishken» atanyp tarap ketti. Dosynyń mundaı syı tartqanyna Lavochkın qatty rıza bolyp, ózi dombyra tarta almaıtynyna qynjylyp, biraq: «Seniń qolyńnan bul kúı halyqqa jaıylady ǵoı, shesheme kórgende aıtarmyn» dep ýáde berip, qushaqtasyp qoshtasyp, ekeýi eki jaqqa júrip ketedi.

 

---