InfoHub Logo

Munda qashan túskenin bilmeıdi. Jer baýyry jylynǵaly óziniń bas kótergisi kelip, erekshe bir sezim ón boıynda týlap jatqanyn sezdi. Biraq, eńsesin qansha kótereıin dese de, boıyn tikteı alar emes. Ásirese sońǵy kezderi jańbyr kóp jaýyp, topyraqpen boıyna nár júgirgeli asaý sezim tipti bulqynyp ketti. Burynǵydaı emes, denesine jylý da kóp keletin boldy. Ol ózin qursaýynan shyǵarmaı turǵan asfálttan surady:

— Bilesiz be, maǵan bul jerden basqa bir keremet álem bar sıaqty seziledi. Ol týraly estigen be edińiz?

— Estidim. Tipti, men sol álemdi kúnde kóremin.

— Keremet! Men de sol álemdi kórsem bola ma? – dep úmit oty oıanǵan názik sabaq qýanyp.

— Joq, sen ony eshqashan kóre almaısyń! Óıtkeni, sen tym áljýazsyń. – dep miz baqpady asfált. Názik sabaqtyń unjyrǵasy túsip ketti.

Rasymen de áljýaz sabaqtarymen qaıda barmaq? Biraq, ol armanynan bas tartpady. Birde ıleý qazǵan bir qumyrsqanyń joly týra búk túsip jatqan názik sabaqtyń ústinen ótti. Jybyrlaǵan tirshilik ıesin kórgen gúl odan da jaryq álem týraly surady:

— Siz jaryq álemnen keldińiz be?

— Iá. Al sen nege búk túsip jatyrsyń?

— Men tym áljýazbyn. Jaryq álemdi kórsem degen armanym bar. Biraq, ony eshqashan kóre almaısyń dedi.

— Kim aıtty?

— Asfált.

— Sony da sóz dep! Tas aıtty dep basyńdy tasqa soqpaqsyń ba? Armanyńnan bas tartpa. Já, men kettim. Jumysym bastan asady. Jaryq álemde kezdeskenshe, - dep qumyrsqa asyǵys júrip ketti. Qysqa tildesý názik sabaqtyń jigerin janydy. Ol tóbesinen tóngen asfálttan bir sańylaý tabýǵa tyrysqan názik sabaqtarymen álsiz japyraqtaryn tireý qylyp tıtteı jaryqtardan alǵa umtyldy. Buǵan miz baqpaǵan asfált biraz ýaqyttan keıin ózin jaryp shyǵýǵa tyrysyp jatqan tirshilikke qarap mysqyldaı kúldi:

— Áı, álsiz sabaq, qaıda asyqtyń? Sen ne, meniń myqty qursaýymdy jaryp shyǵa alamyn dep oılaısyń ba?

— Árıne! Qıyndyqtyń qursaýy bir kúnde emes, ár sát saıynǵy kúrespen qıraıdy emes pe? – dep jaýap qatty álsiz sabaqtar.

— Kórermiz, - dep myrs etti asfált. Ol óziniń beriktigine eshqashan kúmándanǵan emes.

— Kórermiz, - dedi názik sabaq. Ol názik bolsa da, qaısar edi.

Osylaısha kúnde áljýaz sabaqtarymen asfálttyń qabatyn ıtere berdi. Ár kúngi kúres saıyn ol tamyrynyń tereńdep, sabaǵynyń jýandaı bastaǵanyn sezdi. Asfált ta qarysyp baqty. Názik sabaqtar da alǵan betinen qaıtpady.

Búgin boıyn erekshe qýat pen qýanysh bılegen sabaq bar kúshin salyp kishkentaı sańylaýdan keń álemge shyqty. Kúnniń nury! Qandaı keremet ediń! Boıyna birden jylý júgirdi. Jaryq álem, keń álem osy eken ǵoı. Tap-taza kók aspanda appaq kemedeı aqsha bulttar júzip júr. Qustar saırap, qurt-qumyrsqa júgirip, tirshilik qazany qyz-qyz qaınaýda. Onyń alyp-ushqan kóńili osy keremet álemniń bar ekenin bilgen eken ǵoı. Bolattaı berik asfáltty jaryp shyqqan názik sabaqtarǵa bar tirshilik tańyrqaı qarady. Onyń qaısarlyǵyna tań-tamasha qaldy. Alystaǵy kúnniń ózi oǵan jylýyn aıamaı tókti. Ertesi japyraqtaryn jerge bekitken názik sabaqtardan ádemi kúlteler bas kóterdi. Bul ádemi Gúl eken. Qaısar Gúl. Asfálttiń ózi jeńilgenin moıyndap, Qaısar Gúlge tómennen qarap jatty. Zý-zý etip ótip jatqan kóliktegi adamdar da, «Anany qara, asfáltti jaryp gúl ósip shyǵypty! Qandaı keremet!» dep tańyrqasty.  Ómirde kóptegen qıyndyq kórip, kúrese almaı júrgen jandar asfáltti jaryp shyqqan názik gúlden úlgi alyp, ómirlerin qaıt bastapty. Qaısar gúl osylaısha basqalardyń armanyna jiger berip, óz armanyna jetipti.

---