InfoHub Logo

Astanada ótip jatqan «Astana Winner 2026» halyqaralyq ıt kórmesi júzdegen qatysýshyny jáne álemdik kınologıa qaýymdastyǵynyń nazaryn aýdardy. Kórmeniń basty qonaqtarynyń biri – Qazaqstanǵa alǵash ret kelgen Halyqaralyq kınologıa federasıasynyń (FCI) prezıdenti Tamash Iakkel.

Bul týraly Infohub.kz aqparat agenttigi habarlaıdy.

«Otbasymyzǵa qosh keldińizder»

Kórme 2-3 mamyr kúnderi EXPO halyqaralyq kórme ortalyǵynda ótýde. Bul kúnderi ortalyq júzdegen ıt pen olardyń ıelerine tolyp, úlken arenaǵa aınaldy. Vengrıa, Shveısarıa jáne Qytaıdan kelgen halyqaralyq sarapshylardyń qatysýymen ótip jatqan sharada ártúrli tuqymdas ıtter baq synasýda.

Bıyl kórmege 350-den astam ıt qatysýda. Alaıda, erekshe nazar Qazaqstannyń ulttyq maqtanyshy – qazaq tazysyna aýdaryldy. Arenada 60-tan astam ásem de shapshań, dalanyń rýhy men kóp ǵasyrlyq tarıhy bar tazylar jınaldy.

«Munshama tazyny birinshi ret kórip turmyn»

FCI prezıdenti Tamash Iakkel Qazaqstannyń halyqaralyq kınologıa júıesine qosylýy kópjyldyq jumystyń mańyzdy kezeńi bolǵanyn atap ótti. Ol qazaqstandyq kınologıalyq odaqtyń jas bolsa da, myqty uıym ekenin aıtyp, tazy tuqymyn taný jumystaryndaǵy yntymaqtastyqtyń jalǵasatynyn málimdedi.

«Búgin munda 60-tan astam tazy tuqymdas ıt usynylǵan. Men ómirimde munshama tazyny bir jerde kórgen emespin», - dep moıyndady Iakkel.

Ol mundaı is-sharalar tájirıbe almasý turǵysynan mańyzdy ekenin aıtyp, Qazaqstanǵa alǵash ret FCI prezıdenti retinde kelgenin erekshe atap ótti. Iakkeldiń aıtýynsha, Qazaqstannyń kınologıalyq júıesiniń tanylýyna ulttyq asyl tuqymdy kitaptyń jumysy zor úles qosqan.

«Jeti qazyna»: nege tazy – jaı ǵana tuqym emes?

Ekologıa jáne tabıǵı resýrstar mınıstri Erlan Nysanbaev qazaq tazysyn damytý – memlekettik saıasattyń jáne ulttyq murany saqtaý jónindegi júıeli jumystyń bóligi ekenin aıtty. Onyń sózinshe, tazy – elimizdiń maqtanyshy jáne «Jeti qazynanyń» biri.

Mınıstrdiń aıtýynsha, mundaı kórmeler ulttyq tuqymdardy nasıhattaýǵa baǵyttalǵan. Qazaqstan kınologtar odaǵynyń prezıdenti Baýyrjan Serikqalı kórmeniń zootehnıkalyq mańyzyn, ıaǵnı ıtterdiń tuqym standartyna sáıkestigin baǵalaý, taza tuqymdy saqtaý jáne baqylaý jumystaryn atap ótti. Ol sońǵy jyldary tazy tólderiniń sanynyń artqanyn da aıtty.