InfoHub Logo

Astanada energetıka mınıstri Erlan Aqkenjenovtiń tóraǵalyǵymen Qarashyǵanaq gaz óńdeý zaýytynyń qurylysy boıynsha keńes ótti. Jıynǵa «Samuryq-Qazyna», «QazMunaıGaz» ulttyq kompanıalarynyń, «QMG Qarashyǵanaq» JSHS ókilderi men joba aksıonerleri qatysty.

Bul týraly Infohub.kz aqparat agenttigi habarlaıdy.

Jobanyń mańyzdylyǵy

Energetıka mınıstrligi Qarashyǵanaq gaz óńdeý zaýytynyń jylyna 5 mıllıard tekshe metr gaz óńdeý qýattylyǵymen salynýy – Memleket basshysynyń tikeleı tapsyrmasy ári gaz salasyn 2029 jylǵa deıin damytýdyń keshendi josparynyń negizgi bóligi ekenin atap ótti. Zaýyttyń basty maqsaty – ishki naryqtyń ósip kele jatqan qajettiligin taýarlyq gazben qamtamasyz etý jáne buryn Reseıdiń Orynbor gaz óńdeý zaýytyna baılanǵan qaıta óńdeý qýattylyqtaryn ártaraptandyrý arqyly ımportqa táýeldilikti azaıtý.

Jobanyń damý kezeńderi

Mınıstrlik málimetinshe, jobanyń ekonomıkalyq tıimdiligi rastalǵan. Sondaı-aq, qytaılyq «CITIC Construction» korporasıasymen yntymaqtastyq negizderi týraly kelisimge qol qoıyldy. Qazirgi ýaqytta bazalyq jobalaý kezeńi – FEED-ke daıyndyq jumystary júrgizilýde. Buǵan qosa, jer ýchaskesi, ınfraqurylym jáne shıkizatpen qamtamasyz etý máseleleri pysyqtalýda.

«QazaqGaz» – biryńǵaı operator

Strategıalyq mańyzdy jobanyń biryńǵaı operatory bolyp «QazaqGaz» ulttyq kompanıasy belgilendi. Bul sheshim jobany iske asyrýǵa kirisýdi jedeldetedi dep kútilýde.

Sheteldik aksıonerlermen kelissózder

Keńeste Qarashyǵanaq jobasynyń sheteldik aksıonerlerimen júrgizilgen kelissózderge de erekshe nazar aýdaryldy. Talqylaýda shıki gazdy kepildendirip jetkizý, baǵa belgileýdi kelisý jáne bolashaq zaýytty ken ornynyń qoldanystaǵy ınfraqurylymymen ıntegrasıalaý máseleleri qozǵaldy. Energetıka mınıstri Erlan Aqkenjenov kelissózderdiń keshigýi qurylystyń belsendi kezeńine ótýge kedergi keltirip otyrǵanyn aıtty. Ol: «Bul zaýyt Qazaqstan úshin óte mańyzdy, jobanyń bastalý merzimin sheksiz keıinge qaldyrýǵa bolmaıdy. Memleketke nátıje kerek», – dep atap ótti.

Keńes qorytyndysy boıynsha, jobany iske asyrý erekshe baqylaýǵa alyndy.