InfoHub Logo

Elimizdegi medısınalyq JOO-lar úshin álemniń úzdik 500 JOO qataryna kiretin AQSH, Italıa, Shvesıa, Polsha ýnıversıtetterin strategıalyq áriptester retinde shaqyrady. 16-17 qańtarda Parıjde ótken Joǵarǵy deńgeıdegi saıası forým men Ekonomıkalyq yntymaqtastyq jáne damý uıymy Densaýlyq saqtaý salasy boıynsha komıtetiniń otyrysyna qatysqan QR Densaýlyq saqtaý jáne áleýmettik damý vıse-mınıstri Alekseı Soı osylaı málim etti.

Joǵaryda atalǵan forýmǵa 300-den astam adam qatysty. Olardyń qatarynda EYDU qatysýshy elderi men damýshy elderdiń densaýlyq saqtaý mınıstrleri men joǵarǵy deńgeıli ókilderi, belgili akademıkter men saýda odaqtarynyń ókilderi boldy, dep habarlaıdy DSÁDM baspasóz qyzmeti.

Alekseı Soı EYDU Densaýlyq saqtaý salasy boıynsha komıteti otyrysynyń aıasynda ótken sesıada «Densaýlyq saqtaý salasyndaǵy mamandardyń rolin reformalaý» atty baıandamasynda qazirgi tańda densaýlyq saqtaý júıesinde arnaıy eńbek naryǵyn qurýǵa, onyń ishinde kadrlyq resýrstardy toltyrýdyń  sapaly boljamyn jasaýǵa, orta jáne joǵarǵy medısınalyq bilimi bar mamandardy daıarlaý máselelerin qaıta qarastyrýǵa, kásibı bilimniń sapasyna qoıylatyn talapty arttyrý qajettiligi bar ekenin atap aıtty.

«Eńbek naryǵy men adam resýrstaryn damytý boljamy men baqylaýyn tıimdi júrgizý, Qazaqstanda densaýlyq saqtaý salasyndaǵy kadrlardy daıarlaýdy josparlaý men basqarýdyń zamanaýı tásilderin engizý maqsatynda densaýlyq saqtaý salasy kadrlyq resýrtaryn josparlaý men boljaýdyń tıimdi ádisterin engizý men ony ázirleýmen aınalysatyn Kadrlyq resýrstar observatorıasy quryldy», - dep habarlady Alekseı Soı.  

Sonymen birge, vıse-mınıstr densaýlyq saqtaý salasy kadrlyq áleýetin jetildirýge S.D. Asfendıarov atyndaǵy Qazaq Ulttyq medısınalyq ýnıversıtetinde ashylǵan Dúnıejúzilik densaýlyq saqtaý uıymynyń alǵashqy medısınalyq-sanıtarlyq kómek boıynsha (ári qaraı - MSAK) geografıalyq shalǵaıdaǵy keńsesi de yqpal etetinin atap aıtty.

 «DDSU MSAK boıynsha geografıalyq shalǵaıdaǵy keńsesi 53 DDSU qatysýshy-memleketterdi úılestiretin Eýropalyq aımaq pen Ortalyq Azıadaǵy BUU-nyń alǵashqy iri keńsesi bolyp tabylady. Onyń ashylýy jergilikti kadrlardy, sonymen qatar, DDSU  barlyq Eýropalyq aımaq mamandaryn oqytýǵa, halyqaralyq sanattaǵy sarapshylardy shaqyra otyryp MSAK kadrlaryn qaıta daıarlaý men daıyndaýdy jaqsartýǵa múmkindik beretin bolady», - dedi ol.

Sonymen birge, densaýlyq saqtaý júıesi kadrlyq áleýetin tıimdi paıdalaný men ony baqylaý maqsatynda barsha kásibı belsendi mamandardy qamtıtyn Densaýlyq saqtaý salasy kadrlyq resýrstarynyń kásibı regıstri qurylýda. Halyqtyń suranysyna saı joǵarǵy sapaly, qoljetimdi qyzmetterdi kórsete almaý qaýpin tómendetýge, kadrlyq resýrstardy basqarý tıimdiligin arttyrýǵa negizdelgen Densaýlyq saqtaý salasy kadrlyq resýrstaryn basqarýdyń ulttyq korporatıvtik saıasaty ázirlendi.

«Jańa sharttar kadrlardy daıarlaý júıesin jetildirýdi talap etedi. Sondyqtan, Qazaqstan elimizdegi medısınalyq JOO úshin álemniń úzdik 500 JOO qataryna kiretin AQSH, Italıa, Shvesıa, Polsha ýnıversıtetterin strategıalyq áriptester retinde shaqyrady», - dep málimdedi Alekseı Soı.

Vıse-mınıstr sheteldik áriptesterine Qazaqstanda negizgi  áleýmettik máni bar, eldiń demografıalyq ahýalyna aıtarlyqtaı áseri bar 5 negizgi nozologıa (mıokardtyń jiti ınfarkti, mıdaǵy qan aınalymynyń aýyr aýytqýlary (ınsýlt), qaterli isik aýrýlary, synyqtar, júktilik jáne bosandyrý) boıynsha medısınalyq kómek kórsetýdiń  biriktirilgen úlgisi kezeń kezeńimen engizilip jatqanyn habarlady.

Elektrondyq densaýlyq saqtaý júıesiniń halyqaralyq jáne qazaqstandyq birqatar standarttarynyń negizinde Densaýlyq saqtaý salasyn aqparattandyrý men  ınteroperabeldik platformasy engizilmek. Ol respýblıkanyń barsha azamattarynyń elektrondy densaýlyq pasportyn, densaýlyq saqtaý salasy qyzmetkeri men pasıenttiń jeke kabınetin, densaýlyq saqtaý salasy biregeı málimetter qoryn engizýge múmkindik beredi.

---