InfoHub Logo

Qazaqstan ekonomıkasy qarqyndy ósip keledi, biraq bul ósimniń arty qyzyp ketýge ákelýi múmkin. Bul týraly Halyqaralyq valúta qorynyń (MVF) sarapshylary málimdedi. Olar 2025 jyldyń qarasha aıynda Qazaqstanǵa sapar shegip, zertteý júrgizgen bolatyn.

Bul týraly Infohub.kz aqparat agenttigi habarlaıdy.

Ekonomıkanyń jasandy ósýi

MVF esebinde Qazaqstan ekonomıkasynyń 2025 jyly joǵary qarqynmen ósýi kezinde qyzyp ketkeni aıtyldy. Bul jaǵdaıǵa kvazımemlekettik sektor arqyly negizgi salalarǵa qarjy quıý áser etti.

— İshki suranystyń turaqty keńeıýi, munaı óndirý kóleminiń artýy, munaıǵa qatysy joq salalardaǵy belsendilik jáne iri ınfraqurylymdyq jobalardyń júzege asyrylýy fıskaldyq saıasattyń yntalandyrýshy jaǵdaıynda jáne memlekettik kásiporyndardyń ınvestısıalarynyń artýy arqyly qoldaý tapty, — delingen esepte.

Ekonomıkany salqyndatý qajet

MVF sarapshylary Qazaqstannyń fıskaldyq jáne syrtqy rezervteriniń jetkilikti ekenin, al bank sektorynyń turaqty ekenin atap ótti. Olar Ulttyq banktiń aqsha-nesıe saıasatyn qatańdatýyn, onyń ishinde bazalyq mólsherlemeni kóterýin quptady jáne ınflásıamen kúresý úshin qabyldanǵan sharalardy saqtaýdy usyndy. Sonymen qatar, qysqa merzimdi notalardy shyǵarý arqyly ótimdilikti basqarýdyń tıimdiligin arttyrý qajet ekenin aıtty.

— MVF makroekonomıkalyq saıasatty úılestirýdi kúsheıtý, kvazımemlekettik operasıalardy shekteý, búdjet erejelerin qatań saqtaý jáne búdjettiń Ulttyq qordan transfertterge táýeldiligin azaıtý qajettigin atap ótti. Ekonomıkany ártaraptandyrýǵa jáne ósý qarqynyn arttyrýǵa baǵyttalǵan qurylymdyq reformalardy tezdetý usynylady, — dedi Ulttyq bank ókilderi.

Sarapshylar memleket rólin azaıtyp, jeke sektordy damytý, iskerlik klımatty jaqsartý jáne qarjylyq turaqtylyqty nyǵaıtý qajettigin aıtty. Sonymen qatar, munaıdyń álemdik baǵasynyń quldyraýy jáne negizgi saýda seriktesterindegi ekonomıkalyq qıyndyqtar sıaqty táýekelderge nazar aýdarý kerek.

MVF Qazaqstan ekonomıkasynyń ósý qarqyny aldaǵy jyldary 3,5%-ǵa deıin baıaýlaıdy dep kútýde.

Ulttyq banktiń josparlary

Qazaqstan Ulttyq banki 2026 jyldyń birinshi jartysynda qatań aqsha-nesıe saıasatyn saqtaýdy josparlap otyr. Retteýshi basshysy Tımýr Súleımenov ınflásıanyń birneshe aı boıy turaqty túrde 10%-ǵa deıin tómendeýi jaǵdaıynda ǵana bazalyq mólsherlemeni tómendetýge bolatynyn aıtty.