InfoHub Logo

Qazaqstan endigide az zerttelgen, biraq munaı men gaz qoryna baı shógindi baseınderdi barlaýǵa kirisedi. Bul týraly Indýstrıa jáne qurylys mınıstri Ersaıyn Naǵaspaev málimdedi.

Bul jumystar elimizdiń ońtústik-shyǵys jáne soltústik aımaqtaryn qamtıdy. Mınıstrdiń aıtýynsha, Shý-Sarysý jáne Soltústik Torǵaı oıystary boıynsha seısmobarlaý jumystary josparlanyp otyr. Bul zertteýlerdiń nátıjeleri tereńdetilgen izdeý jáne barlaý jumystaryn bastaýǵa negiz bolady dep kútilýde.

Shý-Sarysý jáne Soltústik Torǵaı oıystary

Shý-Sarysý baseıni – Qazaqstannyń ońtústik-shyǵysy men ortalyǵyndaǵy iri shógindi jáne sý sharýashylyǵy aımaǵy. Bul aımaq munaı men gazǵa baı, sondaı-aq mys kenderi men jer asty sýlarynyń eń iri artezıan baseıni retinde belgili.

Al Soltústik Torǵaı oıysy – Qostanaı oblysynyń soltústigindegi perspektıvaly, biraq áli tolyq zerttelmegen munaıly-gazdy aımaq.

Qazaqstandaǵy ken oryndary

Qazirgi tańda Qazaqstanda shamamen 10 myń ken orny esepke alynǵan. Onyń ishinde 1 myńnan astam qatty paıdaly qazbalar, 359 kómirsýtek ken orny, 3700-den astam keń taralǵan paıdaly qazbalar jáne 4900-ge jýyq jer asty sýlarynyń kózderi bar.

Búginde Qazaqstanda munaı negizinen batys óńirlerinde óndiriledi. Atyraý, Mańǵystaý, Batys Qazaqstan jáne Aqtóbe oblystary – negizgi munaı óndirýshi aımaqtar bolyp sanalady.

Buǵan deıin úkimet 2025 jyly keshendi geologıalyq barlaý jumystaryna 40,7 mıllıard teńge bólingenin habarlaǵan bolatyn. Shý-Sarysý jáne Soltústik Torǵaı oıystaryndaǵy geologıalyq zertteýlerdiń qazirgi deńgeıi munaı men gazdyń naqty baǵalanýyna jetkiliksiz bolǵandyqtan, bul aımaqtarda 6 seısmobarlaý jobasy júzege asyrylýda.

Aqparat kózi: Infohub.kz