InfoHub Logo

Qazaqstan Ortalyq Azıada sheteldik ınvestısıa tartýdan kósh bastap keledi. BUU saýda jáne damý konferensıasynyń (UNCTAD) sońǵy baıandamasy boıynsha, 2024 jyldyń sońyna qaraı el ekonomıkasyna quıylǵan tikeleı sheteldik ınvestısıa (TSHI) kólemi 151,3 mıllıard dollarǵa jetti. Bul kórsetkish eldiń jalpy ishki óniminiń (JİÓ) 52%-yn quraıdy.

Bul soma Ortalyq Azıadaǵy basqa elder – Ózbekstan, Túrkimenstan, Qyrǵyzstan jáne Tájikstanǵa salynǵan ınvestısıanyń jalpy kóleminen (69,3 mıllıard dollar) eki eseden astam. Iaǵnı, aımaqtaǵy barlyq sheteldik kapıtaldyń úshten ekisinen astamy Qazaqstanǵa tıesili.

Investısıa kólemi jaǵynan Qazaqstan Baltyq jaǵalaýy elderiniń keıbirin de basyp ozdy. Mysaly, Estonıa, Latvıa jáne Lıtvaǵa salynǵan ınvestısıanyń jalpy kólemi 97,5 mıllıard dollar bolsa, Qazaqstannyń ınvestısıasy 151,3 mıllıard dollarǵa jetti. Bul eldiń halyqaralyq ınvestorlar úshin tartymdylyǵyn, ınstıtýsıonaldyq ortanyń turaqtylyǵyn jáne úlken naryǵyn kórsetedi.

2000 jyly Qazaqstanǵa salynǵan TSHI nebári 10,1 mıllıard dollar bolsa, 2010 jylǵa qaraı bul kórsetkish 6 eseden astam ósti. Al 2023 jylǵa qaraı Qazaqstan TMD elderi arasyndaǵy mańyzdy ınvestısıalyq ortalyqtardyń birine aınaldy.

Búgingi tańda Qazaqstan kapıtal ımporttaýshy el bolyp qala beredi. Sheteldik kompanıalardyń el ekonomıkasyna salǵan ınvestısıasy qazaqstandyq kompanıalardyń shetelge salǵan ınvestısıasynan (shamamen 18 mıllıard dollar) 8-9 ese artyq. Bul ınvestısıalar óndiris sektoryn, ınfraqurylymdy, qyzmet kórsetý salasyn damytýǵa jáne eldiń aımaqtyq ekonomıkalyq kóshbasshy retindegi pozısıasyn nyǵaıtýǵa yqpal etýde.

Halyqaralyq valúta qorynyń sońǵy derekteri boıynsha, Qazaqstanda jan basyna shaqqandaǵy JİÓ deńgeıi 14,77 myń dollarǵa jetti. Bul Reseı men Qytaı sıaqty iri ekonomıkalardan joǵary.

Osylaısha, Qazaqstan tek kapıtal tartýmen shektelmeı, Ortalyq Azıanyń negizgi ınvestısıalyq tartylys ortalyǵyna aınalyp, ekonomıkanyń uzaq merzimdi turaqtylyǵy men ósýine jaǵdaı jasap otyr.

Bul týraly Infohub.kz aqparat agenttigi habarlaıdy.