InfoHub Logo

2025 jylǵy 1 sáýirdegi jaǵdaı boıynsha Qazaqstan aýmaǵynda jergilikti atqarýshy organdardyń ruqsatymen 13 891 shetel azamaty eńbek etýde. Bul týraly QR Eńbek jáne halyqty áleýmettik qorǵaý mınıstrligi málimdedi.

Shetel jumys kúshin (SHJK) tartý ruqsattary birneshe sanat boıynsha beriledi. Atap aıtqanda, birinshi sanat – basshylar men olardyń orynbasarlaryna 570 ruqsat berilse, qurylymdyq bólimshelerdiń basshylary úshin ekinshi sanat boıynsha 2 439 ruqsat rásimdelgen. Úshinshi jáne tórtinshi sanattarǵa – ıaǵnı, mamandar men bilikti jumysshylarǵa – tıisinshe 4 541 jáne 1 023 ruqsat berilgen. Budan bólek, maýsymdyq jumystarǵa 1 709 adam, al korporatıvtik aýystyrý aıasynda 3 609 shetel mamany tartylǵan.

Qazirgi tańda elimizde shetel jumys kúshin paıdalanatyn 1 768 jumys berýshi bar. Bul mekemelerde jalpy 376 myńnan astam Qazaqstan azamaty jumys isteıdi, bul barlyq qyzmetkerlerdiń 96,4%-yn quraıdy.

Sala boıynsha eń kóp shetel mamandary qurylys salasynda jumys isteıdi – 5 131 adam. Aýyl, orman jáne balyq sharýashylyǵynda – 1 695 adam, taý-ken óndirisi men karerlerdi qazýda – 1 351 adam, al óńdeý ónerkásibinde – 1 232 adam tartylǵan.

Sheteldik eńbek mıgranttarynyń negizgi kelý elderi: Qytaı – 4 885 adam, Ózbekstan – 1 614 adam, Úndistan – 1 150 adam jáne Túrkıa – 1 124 adam.

Mınıstrlik ishki eńbek naryǵyn qorǵaý maqsatynda jyl saıyn sheteldik mamandardy tartýǵa kvota belgilep otyrady. 2025 jyly bul kvota respýblıkadaǵy jumys kúshiniń sanyna shaqqanda 0,2% nemese 14,8 myń birlik kóleminde belgilengen bolatyn. Alaıda bıylǵy naýryz aıynan bastap jergilikti atqarýshy organdardyń ótinimderine baılanysty kvota kólemi 16,5 myń birlikke deıin ulǵaıtyldy.