InfoHub Logo

Qazaqstanda jańa data-ortalyqtar alqabynyń qurylysy bastalady. Bul joba Pavlodar oblysynda, Ekıbastuzdyń energetıkalyq torabynyń janynda júzege asady. Joba aıasynda serverler, bultty qyzmetter jáne jasandy ıntellekt júıelerin ornalastyrýǵa arnalǵan alań qurylady.

Bul týraly Infohub.kz aqparat agenttigi habarlaıdy.

Jobanyń aýqymy

Joba úshin 200 gektar jer bólingen, al bolashaqta bul aýmaq 1300 gektarǵa deıin keńeıtilýi múmkin. Data-ortalyqtar úshin turaqty jáne úlken kólemde elektr energıasy qajet bolǵandyqtan, bul jerdiń energetıkalyq ınfraqurylymy mańyzdy ról atqarady.

Investısıalar jáne jumys oryndary

Jobaǵa 30 mıllıard dollar kóleminde sheteldik ınvestısıalar tartý josparlanýda. Úkimet bul joba arqyly iri halyqaralyq tehnologıalyq kompanıalardy tartýdy jáne energetıka, IT jáne esepteý qýattaryn paıdalaný salalarynda 500 jańa jumys ornyn ashýdy kózdeıdi.

Úkimettiń qoldaýy

Investorlar úshin arnaıy ekonomıkalyq aımaqtar qaǵıdaty boıynsha daıyn ınfraqurylym, arnaıy tarıfter jáne salyq jeńildikteri usynylady. Premer-mınıstr bul jobany jeke ózi qadaǵalaıtynyn málimdedi: "Bul – bolashaq ındýstrıasy. Bizdiń básekelestik artyqshylyqtarymyzdy paıdalaný mańyzdy. Joba úshin barlyq qajetti sheshimderdi qabyldap, búrokratıasyz alǵa jyljýymyz kerek. Men bul jobamen jeke aınalysamyn".