InfoHub Logo

Búgin, 10 mamyrda Qazaqstanda Ulttyq biryńǵaı testileýdiń (UBT) negizgi kezeńi bastaldy. Emtıhan 10 shildege deıin jalǵasady. Bul týraly Infohub.kz aqparat agenttigi habarlaıdy.

Bıyl UBT-ǵa qatysýǵa shamamen 240 myń talapker ótinish bergen. Eki ret tapsyrý múmkindigin eskersek, 446 myńnan astam ótinish qabyldandy. Onyń 74 paıyzy qazaq tilinde, 26 paıyzy orys tilinde, al 851 talapker aǵylshyn tilinde emtıhan tapsyrýdy qalaǵan.

Ulttyq testileý ortalyǵynyń dırektory Nurserik Baıjanovtyń aıtýynsha, emtıhandy tapsyrý kúni men ýaqytyn talapkerler ózderi tańdaǵan. Alǵashqy kúni respýblıka boıynsha 926 adam, sonyń ishinde Astanada 359 talapker test tapsyrady. Testileý 45 pýnktte uıymdastyrylǵan.

Eń tanymal pánder

Tańdaý boıynsha eń kóp suranysqa ıe pán kombınasıasy – «Matematıka-Fızıka». Bul kombınasıany talapkerlerdiń 17,9 paıyzy tańdaǵan. Bul bolashaq ınjenerler, muǵalimder, energetıkter jáne basqa da tehnıkalyq mamandyqtarǵa degen qyzyǵýshylyqty kórsetedi.

Odan keıingi oryndarda «Bıologıa-Hımıa» (14,5%) jáne «Shyǵarmashylyq emtıhan» (12,4%) kombınasıalary tur. Bul kombınasıalar bolashaq medısına qyzmetkerleri men shyǵarmashylyq salaǵa beıim talapkerlerdi qyzyqtyrady.

UBT formaty

2026 jyly UBT formaty ózgerissiz qalady. Talapkerler úsh mindetti jáne eki tańdaý boıynsha pán tapsyrady. Barlyǵy 120 tapsyrma beriledi: «Qazaqstan tarıhynan» – 20, «Oqý saýattylyǵy» men «Matematıkalyq saýattylyqtan» – árqaısysynan 10, al eki profıldi pánnen árqaısysynan 40 tapsyrma bolady. UBT-dan maksımaldy jınaýǵa bolatyn bal – 140.

Emtıhanǵa beriletin ýaqyt

Testileýge beriletin ýaqyt – 4 saǵat (240 mınýt). Erekshe bilim qajettiligi bar balalarǵa qosymsha 40 mınýt beriledi.

Apelásıaǵa qalaı beriledi?

Talapkerler testileý aıaqtalǵannan keıin 30 mınýt ishinde apelásıaǵa berýge bolady. Apelásıalyq komısıa sheshim qabyldaǵannan keıin sertıfıkat talapkerdiń jeke kabınetinde qoljetimdi bolady.

Shekti bal

Ulttyq joǵary oqý oryndaryna túsý úshin eń tómengi shekti bal – 65, basqa JOO-larǵa – 50 bal. Pedagogıkalyq ǵylymdar salasy boıynsha – 75 bal, densaýlyq saqtaý salasy boıynsha – 70 bal, quqyq mamandyǵy boıynsha – 75 bal.

Sonymen qatar, «Qazaqstan tarıhy» jáne eki profıldi pánnen keminde 5 bal, al «Oqý saýattylyǵy» men «Matematıkalyq saýattylyqtan» keminde 3 bal jınaý qajet.

JOO-lar bilim berý baǵdarlamalary toptary boıynsha ózderiniń shekti baldaryn belgileı alady.

Qaýipsizdik

Testileý kezinde qaýipsizdikti qamtamasyz etý jáne buzýshylyqtardyń aldyn alý maqsatynda metal detektorlary qoldanylady. Aýdıtorıalarda uıaly jáne radıoelektrondyq baılanys sıgnaldaryn basatyn qurylǵylar ornatylady, sondaı-aq beınebaqylaý júrgiziledi. Emtıhan aıaqtalǵannan keıin beınejazbalar taldanady. Zapreshennyı zattardy qoldaný nemese erejelerdi buzý faktileri anyqtalsa, talapkerdiń UBT nátıjeleri joıylady.