InfoHub Logo

Qazaqstanda paıyzsyz, ıaǵnı ıslam qaǵıdattaryna saı ıpotekalyq baǵdarlamany iske qosý múmkindigi qarastyrylýda. Bul týraly «Baıterek» Ulttyq basqarýshy holdıńiniń basqarma tóraǵasy Rýstam Qaraǵoıshın málimdedi.

Bul týraly Infohub.kz aqparat agenttigi habarlaıdy.

Halyq suranysy jáne halyqaralyq seriktestik

Rýstam Qaragoıshınniń aıtýynsha, azamattar tarapynan mundaı qarjylyq sheshimderge degen suranys bar. Osyǵan baılanysty, «Otbasy banki» arqyly ıslam ıpotekasyn engizý joldary halyqaralyq ınstıtýttarmen birlesip zertdelýde. «Bizdiń qurylymdaǵy «Otbasy banki» halyqpen tikeleı jumys isteıtin birden-bir uıym. Halyqtyń belgili bir bóligi dinı qaǵıdattardy ustanatyny belgili. Sondyqtan mundaı ótinishter túsip jatyr. Bul másele boıynsha jumystar júrgizilýde. Naqty merzimder ázirge belgisiz, biraq bul baǵytta birneshe halyqaralyq ınstıtýttarmen memorandýmdarǵa qol qoıyldy», - dedi Qaraǵoıshın.

Islam ıpotekasy degen ne?

Islam ıpotekasy – bul sharıǵat normalaryna sáıkes keletin turǵyn úı satyp alý tásili. Ol klasıkalyq nesıelerdegideı paıyzdyq mólsherlemelerdi qoldanýǵa tyıym salady. Onyń ornyna, bank jyljymaıtyn múlikti ózi satyp alyp, klıentke belgili bir ústemeaqymen bólip tóleýge beredi nemese klıentpen birlesip menshikke ıe bolyp, keıinnen úlesin birtindep klıentke aýdarady. Basty qaǵıdaty – paıyzdardyń bolmaýy, mámile sharttarynyń ashyqtyǵy jáne taraptar arasyndaǵy táýekelderdi bólý.

«Otbasy bankiniń» júıesi jáne bolashaq

«Baıterek» holdıńiniń basshysy bul mehanızm ázirge zertteý satysynda ekenin atap ótti. «Qazir tek zerttep jatyrmyz. «Otbasy banki» bizdiń azamattarǵa qalaı mundaı sheshim usyna alatynyn anyqtap jatyrmyz. Bul áli de pysyqtalý ústinde», - dep tolyqtyrdy ol.

Qaraǵoıshın ıslam ıpotekasynyń naqty merzimderi týraly aıtý áli erte ekenin qaıtalady. Sebebi, banktegi qoldanystaǵy model jınaqtaý júıesine negizdelgen. «Biz bul qyzmetti ashamyz dep aıta almaımyz, óıtkeni «Otbasy bankiniń» negizgi júıesi memlekettik baǵdarlamalardan bólek, jınaqtaý júıesi bolyp tabylady. Islam ıpotekasy jınaqtaý júıesinen sál ózgeshelenedi. Bizdiń jınaqtaý júıemiz nemis úlgisine uqsas. Sondyqtan biz aldymen zerttep, sodan keıin sheshim qabyldaımyz», - dep qorytyndylady holdıń basshysy.