InfoHub Logo

Prezıdent Qasym-Jomart Toqaevtyń jańa jarlyǵymen Qazaqstannyń Sybaılas jemqorlyqqa qarsy is-qımyl agenttigi taratylyp, onyń ornyna jańa qurylym paıda boldy. Endi bul saladaǵy jumystardy Ulttyq qaýipsizdik komıteti (UQK) atqarady.

Atap aıtqanda, burynǵy agenttik UQK quramyna kirip, onyń aıasynda Sybaılas jemqorlyqqa qarsy qyzmet quryldy. Bul qurylym quqyq qorǵaý baǵytyn saqtap qalady jáne naqty tergeý jumystarymen aınalysady.

Al endi saıasat qalyptastyrý, jemqorlyqtyń aldyn alý, sebepterin azaıtý, qoǵamda adaldyq qundylyqtaryn nasıhattaý sekildi mindetter Memlekettik qyzmet isteri agenttigine júkteledi.

Toqaevtyń jarlyǵynda naqty merzimder de kórsetilgen:

UQK bir aı ishinde jańa qyzmettiń erejesin ázirlep, ony Prezıdentke usynýy kerek;

Memlekettik qyzmet agenttigi de bir aı ishinde óz erejesine ózgerister engizý jobasyn daıyndaıdy;

Eki mekeme eki aıdyń ishinde ózge de uıymdastyrý sharalaryn tolyq aıaqtaýy tıis;

Úkimetke 1 qyrkúıekke deıin jańa zań jobasyn jasap, Parlamentke engizý tapsyryldy.

Jarlyq qol qoıylǵan kúnnen bastap kúshine endi.

Bul ózgeris Qazaqstanda sybaılas jemqorlyqpen kúres tásilderiniń túbegeıli ózgerip jatqanyn bildiredi. Burynǵydaı jeke agenttik bolmaıdy, endi jemqorlardy qýdalaý UQK-nyń mindeti bolady. Al aldyn alý men mádenıetti qalyptastyrý jumystary basqa vedomstvoǵa júkteldi.