InfoHub Logo

Qazaqstanda 17 naýryzdan bastap qalalyq jáne aýdandyq áskerge shaqyrý komısıalary jumysyn bastady. Olar ákim orynbasarlarynyń tóraǵalyǵymen merzimdi áskerı qyzmetke azamattardy shaqyrýdy júzege asyrady. Bıyl kóktemde qansha adam áskerge alynatyny jáne olardyń qaıda jiberiletini týraly Qorǵanys mınıstrligi málimet berdi.

Bul týraly Infohub.kz aqparat agenttigi habarlaıdy.

Áskerge shaqyrylýshylar sany men bólinýi

Qarýly Kúshter Bas shtabynyń uıymdastyrý-jumyldyrý jumystary departamentiniń bastyǵy Almas Isabekovtiń aıtýynsha, 30 maýsymǵa deıin 18-27 jas aralyǵyndaǵy 21 myń azamatty áskerge shaqyrý josparlanǵan.

Onyń ishinde 11 myńnan astam adam Qarýly Kúshterge, 7 myńnan astamy Ulttyq ulanǵa, 2 myń adam UQK Shekara qyzmetine, shamamen 400-i Tótenshe jaǵdaılar mınıstrligine jáne 300-i Memlekettik kúzet qyzmetine jiberiledi.

Shaqyrý qaǵazdary qalaı keledi?

Azamattarǵa shaqyrý qaǵazdary SMS habarlamalar jáne eGov portalyndaǵy habarlamalar arqyly, kelý kúnine deıin keminde úsh kún buryn jiberiledi. Mundaı habarlama resmı bolyp sanalady jáne ony alǵan azamat áskerı komısarıatqa nemese shaqyrý pýnktine kelýge mindetti.

Dáleldi sebepsiz kelmegen jaǵdaıda zań boıynsha jaýapkershilik qarastyrylǵan. Jaǵdaılarǵa baılanysty azamatqa ákimshilik yqpal etý sharalary qoldanylýy múmkin, al ádeıi shaqyrýdan jaltarǵan jaǵdaıda qylmystyq jaýapkershilikke tartylady.

Áskerge shaqyrylýshylarǵa qoldaý sharalary

Qorǵanys mınıstrligi shaqyrylýshylarǵa kórsetiletin qoldaý sharalary týraly da eske saldy. Atap aıtqanda, olarǵa nesıe kanıkýldary jáne UBT nátıjelerine qaramastan joǵary oqý oryndaryna memlekettik bilim granttaryna túsý múmkindigi beriledi. Sonymen qatar, qyzmet kezinde sarbazdar Qarýly Kúshter túrleriniń kishi mamandardy daıarlaý oqý ortalyqtarynda jumysshy mamandyqtaryn ala alady.

Buǵan deıin Prezıdent Toqaev merzimdi áskerı qyzmetin ótegen áskerı qyzmetshilerdi zapasqa shyǵarý jáne 2026 jyldyń naýryz-maýsym jáne qyrkúıek-jeltoqsan aılarynda azamattardy merzimdi áskerı qyzmetke kezekti shaqyrý týraly Jarlyqqa qol qoıǵan bolatyn.