InfoHub Logo

Qazaqstanda mektep oqýshylarynyń smartfon qoldanýyna tolyq tyıym salý týraly zań jobasy ázirlenýde. Bul bastama bilim berý salasyndaǵy pedagog mártebesi men bilim berý máseleleri boıynsha zań jobasy aıasynda qarastyrylyp jatyr.

Buǵan deıin mektep ákimshiligi oqýshylardyń smartfondy qaı jaǵdaıda qoldana alatynyn ózderi anyqtaıtyn. Zań boıynsha tek sabaq kezinde ǵana tyıym salynǵan, al úzilis kezinde telefon paıdalanýǵa ruqsat etilgen edi. Eger muǵalim ruqsat berse, oqý maqsatynda telefon qoldanýǵa da múmkindik boldy.

Jańa erejeler

Jańa zań jobasynyń salystyrmaly kestesine sáıkes, bul normany alyp tastap, oqýshylardyń gadjetterdi qoldaný quqyǵyn bilim berý salasyndaǵy ýákiletti organǵa berý usynylady. Bul óz kezeginde Bilim mınıstrligi nemese jergilikti bilim basqarmalary bolýy múmkin.

Aıta keteıik, bul usynys áli de qarastyrylýda, Parlament Májilisinde resmı sheshim qabyldanǵan joq.

Depýtattardyń usynysy

Depýtattar oqýshylardyń quqyqtary men mindetteri týraly 47-bapqa kelesideı ózgeris engizýdi usynyp otyr:

«Orta bilim berý uıymdarynda oqý prosesi kezinde oqýshylar men tárbıelenýshilerdiń abonenttik qurylǵylaryn (uıaly telefondaryn) paıdalanýyna jol berilmeıdi, biraq bilim berý salasyndaǵy ýákiletti organ bekitken erejelerde kózdelgen jaǵdaılardy qospaǵanda».

Bul sharanyń negizdemesinde, abonenttik qurylǵylardy tek sabaq ýaqytynda ǵana emes, úzilis kezinde de qoldanýǵa tyıym salý kıberbýllıng pen destrýktıvti kontenttiń taralý qaýpin azaıtyp, mekteptegi tártip pen qaýipsizdikti nyǵaıtady. Sondaı-aq, oqýshylardyń tikeleı qarym-qatynasyn arttyryp, olardyń áleýmettenýine yqpal etedi jáne salaýatty bilim berý ortasyn qalyptastyrýǵa septigin tıgizedi.

Esterińizge sala keteıik, mektepte sabaq ýaqytynda smartfon qoldanýǵa zańnamalyq tyıym 2024 jyldyń basynda engizilgen bolatyn. Alaıda, úzilis kezinde oqýshylar telefondaryn qaıta qoldana alatyn.