InfoHub Logo

Elimizdegi bankter endi klıenttermen jańasha jumys isteıtin bolady. Qarjy naryǵyn retteý jáne damytý agenttigi (QNRDA) ázirlegen jańa erejeler jınaǵy bankter men klıentter arasyndaǵy qarym-qatynasty túbegeıli ózgertip, «jaýapty nesıeleý» uǵymyn engizedi. Sondaı-aq, alaıaqtarmen kúres josparlanǵan.

Bul týraly Infohub.kz aqparat agenttigi habarlaıdy.

Alaıaqtarmen kúres: jaýap alý jáne aqshany ustap qalý

Endi bankter bet álpetti tekserýdi qamtıtyn bıometrıalyq aýtentıfıkasıasyz onlaın nesıe bermeıdi. Buǵan qosa, ınternet arqyly beriletin kepilsiz nesıe aldynda bank klıentti anketalaýy tıis. Onda «Nesıe alýǵa kim keńes berdi?», «Qaýipsizdik qyzmetinen habarlasty ma?» degen sıaqty suraqtar qoıylady. Jaýaptar kúdik týdyrsa, nesıeden bas tartylýy múmkin.

Eger onlaın nesıeniń somasy 255 AEK-ten (aılyq eseptik kórsetkish) assa, bank aqshany birden emes, 24 saǵattan keıin aýdarady. Al 150-den 255 AEK-ke deıingi nesıeler úshin, eger alaıaqtyq qaýpi joǵary bolsa, keminde 8 saǵat kútýge týra keledi.

Jubaıynyń kelisimimen ǵana nesıe

Endi 1000 AEK-ke (2026 jylǵy eseppen 4 325 000 teńge) teń nemese odan asatyn kepilsiz qaryz somasy úshin bank mindetti túrde neke tirkelgenin tekserip, jubaıynyń resmı kelisimin talap etedi. Kelisimdi jazbasha, eGov arqyly nemese bank qosymshasy arqyly bıometrıamen berýge bolady.

Bank sizge nesıe qajet emes dep sheshýi múmkin

«Qaryz alýǵa jaramdylyqty baǵalaý» prınsıpi engiziledi. Bank tek tólem qabiletin ǵana emes, ónimniń sizdiń maqsatyńyzǵa saı ekenin jáne zıan keltirmeıtinin de baǵalaıdy. Eger klıent sharttar men táýekelderdi túsinbese, nesıe qarjylyq jaǵdaıdy nasharlatýy yqtımal bolsa, nemese ımpúlsıvti sheshim belgileri baıqalsa, nesıe «jaramsyz» dep tanylyp, bas tartylady.

«Kishkentaı shrıftten» jáne qosymsha qyzmetterdi tańýdan bas tartý

Bankterge jaza qoldanylatyn «ádiletsiz tájirıbeler» tizimi engiziledi. Olarǵa aqparatty jasyrý, ıaǵnı sharttardy túsinikti tilmen baıandamaý jáne nesıe tek saqtandyrý nemese basqa aqyly qyzmetterdi satyp alǵan jaǵdaıda ǵana beriledi degen talap qoıý jatady. Klıentke kelisimshartqa qol qoımas buryn stavka, artyq tólem, merzimder men táýekelder kórsetilgen eki betten aspaıtyn qujat berilýi mindetti.

Ádepti borysh jınaý

Jańa erejeler boryshkerlermen jumys isteýdi qatań retteıdi. Zvonoktar men kezdesýler tek jumys kúnderi saǵat 8:00-den 21:00-ge deıin, al demalys jáne mereke kúnderi saǵat 9:00-den 19:00-ge deıin (tek telefon arqyly) júrgiziledi. Aptasyna 3 retten artyq qońyraý shalýǵa nemese barýǵa bolmaıdy. Barlyq áńgimeler jazylady.

Barlyǵyna qoljetimdilik

Múmkindigi shekteýli jandar úshin arnaıy talaptar qarastyrylǵan. Bankter qoljetimdi qyzmet kórsetý arnalaryn, sýrdoaýdarmany paıdalaný múmkindigin, beıimdelgen bankomattardy jáne senimdi tulǵa arqyly qyzmet alýdy qamtamasyz etýi tıis.

Jańa erejelerdiń kópshiligi qujat resmı jarıalanǵannan keıin kúshine enedi, biraq júıelerdi tehnıkalyq jańartýdy talap etetin keıbir normalar 2026 jyldyń 1 shildesinen nemese 2027 jyldyń 1 qańtarynan bastap qoldanysqa beriledi.