InfoHub Logo

Serbıanyń Vrnáchka-Baná qalasynda ótken jasóspirimder arasyndaǵy rapıd jáne blıs boıynsha shahmattan álem chempıonatynda Qazaqstan quramasy tarıhı rekord ornatty. Qazaqstandyq shahmatshylar jalpy komandalyq esepte birinshi oryndy ıelenip, 21 medaldi jeńip aldy.

Bul týraly Infohub.kz aqparat agenttigi habarlaıdy.

Chempıonat 15-20 sáýir aralyǵynda ártúrli jas sanatynda ótti. Qazaqstannan barlyǵy toǵyz shahmatshy altyn medaldi qanjyǵalady. Bul – el tarıhyndaǵy eń úzdik kórsetkish.

Jas chempıondar

Týrnırdiń alǵashqy kúnderinde, rapıd saıystary bastalǵanda, qazaqstandyq sportshylar altynnan alqa taǵa bastady.

8 jasqa deıingiler arasynda shymkenttik Aslan Endibaev Reseıdiń basty qarsylasy Mıhaıl Shıshovty jeńip, týrnırde top jardy.

10 jasqa deıingi qyzdar arasynda Adelına Nurhanqyzy 11 týrdyń 9-ynda jeńiske jetip, birinshi oryndy ıelendi. Al 12 jasqa deıingiler arasynda Ramazan Tólegen, 18 jasqa deıingiler arasynda Aldıar Ańsat altyn medaldi oljalasa, Aldıardyń fınalyndaǵy qarsylasy da qazaqstandyq Danıal Sápenov boldy.

16 jasqa deıingiler arasynda Elnaz Qalıaqmettiń jeńisi kóp kútilgen edi. Ol týrnırde 11 partıanyń 10-yn utyp, altyn medaldi ıelendi. Elnaz Qalıaqmet Qazaqstannyń eresekter quramasynyń múshesi jáne ótken jyly Álem kýbogynda Grýzıanyń álem chempıony Nıno Basıashvılıdi jeńip, úlken jańalyq jaratqan bolatyn.

Blıstegi jeńister

Blıs týrnırinde de qazaqstandyqtar basymdyq tanytty. 8 jasqa deıingi qyzdar arasynda Venera Jákisheva, 10 jasqa deıingi qyzdar arasynda Álısha Bısalıeva, 14 jasqa deıingi ashyq kategorıada Aldıar Jaras jáne 18 jasqa deıingi qyzdar arasynda Zarına Nurǵalıeva chempıon atandy.

Jalpy, rapıd jáne blıs týrnırlerinde Qazaqstan quramasy 9 altyn, 7 kúmis jáne 4 qola medaldi ıelendi. Bul – buǵan deıingi 2024 jylǵy 16 medaldi jańartyp, eń úzdik nátıje bolyp tirkeldi.

Esterińizge sala keteıik, 2025 jyldyń sońynda qazaqstandyq shahmatshy Bıbisara Asaýbaeva úshinshi ret blıs boıynsha álem chempıony atanyp, shahmattaǵy eń basty týrnırlerdiń biri – pretendentter týrnırine joldama alǵan bolatyn. Onda ol úndistandyq chempıonnan bir upaı ǵana qalyp, ekinshi oryndy ıelenip, 52 myń eýro tabys tapqan edi.