InfoHub Logo

Qazaqstan Parlamenti Senaty týrızmdi qoldaý jáne balalar sportyn damytý baǵytynda zańnamaǵa mańyzdy ózgerister engizýdi usyndy. Jańa erejelerge sáıkes, elimizde jańa oıyn-saýyq aımaqtary ashylady. Alaıda, bul jańalyqtyń ereksheligi – onda tek sheteldik azamattar ǵana oınaı alady.

Bul týraly Infohub.kz aqparat agenttigi habarlaıdy.

Jańa oıyn aımaqtarynyń ashylýy

Senator Amangeldi Esbaıdyń aıtýynsha, zań jobasy boıynsha oıyn bıznesin ornalastyrýǵa ruqsat etilgen aýmaqtardyń tizimi keńeıtiledi. Buǵan deıin tek Býrabaı men Qapshaǵaıda ǵana ruqsat etilgen bolsa, endi Mańǵystaý, Jetisý, Almaty jáne Shyǵys Qazaqstan oblystarynda da jańa oıyn aımaqtary paıda bolýy múmkin.

«Bul jańa aýmaqtardaǵy oıyn mekemelerine tek sheteldik azamattardyń kirýine ǵana ruqsat etiledi. Bul – mańyzdy shekteý bolyp tabylady», - dedi depýtat.

Týrızm salasyn damytý

Zańnamaǵa engiziletin ózgerister týrızm salasyn damytýǵa da baǵyttalǵan. Vızıt-sentrler týrısik nysandar retinde zańdy mártebege ıe bolady. Olardy týrısik baǵyttarǵa ornalastyrý, sondaı-aq qurylys, rekonstrýksıa jáne jabdyqtaý tártibi aıqyndalady. Budan bólek, halyqaralyq turaqty emes jolaýshylar tasymalyn uıymdastyratyn týroperatorlarǵa arnalǵan qujattardy resimdeý jáne memlekettik shekaradan ótýge ruqsat berý rásimderi jeńildetiledi.

Sport jáne bilim salasyndaǵy jańalyqtar

Sonymen qatar, qujatta «gıd», «ekskýrsovod», «týrızm nusqaýshysy», «týrısik resýrstar» jáne «týrısik nysandar» sıaqty negizgi uǵymdar birizdendiriledi. Bul gıdter men nusqaýshylardyń qyzmetin kásipkerlik formasymen shektemeı, bilikti mamandar sanyn kóbeıtýge múmkindik beredi.

Balalar men jasóspirimder sportyn qarjylandyrý júıesin reformalaý da kózdelgen. Atap aıtqanda, sportty damytýǵa arnalǵan búdjetten tys qarajatty bóletin biryńǵaı operatordyń qarjylyq eseptiligine jyl saıyn aýdıt júrgizý mindetteledi. Sondaı-aq, memlekettik balalar-jasóspirimder sport mektepterinde jan basyna shaqqandaǵy qarjylandyrý normatıvi bekitiledi.

Aıta keteıik, Senat «Týrısik sala men balalar sportyn qoldaý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zańdy maquldady.