InfoHub Logo

Qazaqstanda shetelden, ásirese Reseı, Qyrǵyzstan jáne Ózbekstannan ákelingen telefondardy tirkeý qıyndap, jappaı buǵattaýlar oryn alýda. Bul jaǵdaı tutynýshylar men satýshylardyń narazylyǵyn týdyryp otyr.

Bul týraly Infohub.kz aqparat agenttigi habarlaıdy.

Telefondardy tirkeýdegi qıyndyqtar

Satýshylardyń aıtýynsha, telefondardy tirkeý kezinde IMEI kodtaryn júıe qabyldamaı qoıǵan. Bul tek jańa qurylǵylarǵa ǵana emes, 4-5 jyl buryn satylǵan telefondarǵa da qatysty bolyp otyr.

«Klıentter de, biz ózimiz de aqshamyzǵa alǵan qurylǵylardy paıdalana almaımyz. Tekserý formaldy túrde tegin bolǵanymen, proses kúrdeli. Sondyqtan adamdar tirkeýden ótý úshin basqalarǵa 30-50 myń teńge tóleýge májbúr. Qazir tipti zań qabyldanǵanǵa deıin satyp alynǵan smartfondar da jumysyn toqtatty», - deıdi satýshy Ánel Erǵazınova.

Jańa talaptar men onyń saldary

Kásipkerlerdiń sózinshe, jańa norma engizilgennen keıin ekinshi nómirdi ornatqan kezde júıe tekserýdi talap etedi. Olsyz qurylǵy «sur tizimge» enip, bir aıdan soń buǵattalady. Mundaı máselege tap bolǵan satyp alýshylar kimge júginerin bilmeı dal bolýda.

Kompanıa jaýaby

Qazaqstanda telefondardy tirkeýmen jeke «ATS Mediafon KZ» JSHS aınalysady. Alaıda, kásipkerler tirkeýge ótinim qabyldaıtyn saıttyń durys jumys istemeıtinin aıtady. Kompanıa ókili bul pikirmen kelispeıdi.

«Telefonnyń shyqqan eline baılanysty buǵattaý bolmaıdy. Qurylǵynyń zańdy túrde ákelingenin rastaıtyn qujattar bizge jetkilikti. Eger telefondar talaptarǵa sáıkes ákelinip, resimdelse, olar esh qıyndyqsyz tekserýden ótedi. Kedendik tirkeýsiz jáne qajetti tólemdersiz ákelingender tirkelmeıdi. Jeke tulǵalar úshin tirkeý tegin, al kásipkerler bir qurylǵy úshin 4325 teńge tóleıdi», - deıdi JSHS komersıalyq dırektory Mádı Sherim.

Kompanıa kásipkerlermen dıalogqa daıyn ekenin málimdedi. Al satýshylar tirkeýmen memleket aınalysýyn talap etýde.