InfoHub Logo

Áleýmettik jelide, ásirese Threads platformasynda Almaty qalasy boıynsha "Azamattardyń áleýmettik-ekonomıkalyq mártebesiniń shkalasy" dep atalatyn keste qyzý talqyǵa tústi. Bul kestede tabys deńgeıine qaraı adamdardy ártúrli sanattarǵa – az qamtylǵandardan bastap múltımıllıonerlerge deıin bóledi.

Bul týraly Infohub.kz aqparat agenttigi habarlaıdy.

Kestege sáıkes, aıyna 250 myń teńgege deıin tabys tabatyndar "az qamtylǵandar" sanatyna jatqyzylsa, 250 myńnan 450 myń teńgege deıin alatyndar "kedeıler" dep atalǵan. Al 650 myńnan 1 mıllıon teńge aralyǵyndaǵy tabys "orta tap" dep belgilengen.

Odan joǵary, 5-ten 15 mıllıon teńgege deıingi tabys ıeleri "mıllıonerler", al 15-ten 100 mıllıon teńgege deıin alatyndar "múltımıllıonerler" dep sıpattalǵan.

Resmı klassıfıkasıa bar ma?

Bul jazba jelide tez tarap, qoldanýshylar arasynda resmı túrde mundaı jikteý bar-joǵy týraly pikirtalas týdyrdy. Osyǵan baılanysty, QR Eńbek jáne halyqty áleýmettik qorǵaý mınıstrligine resmı saýal joldandy.

Vedomstvonyń málimetinshe, mınıstrlik deńgeıinde azamattardyń áleýmettik-ekonomıkalyq mártebesin (mysaly, "az qamtylǵan", "kedeı", "ótpeli klass" jáne t.b.) naqty tabys shekterimen resmı bekitilgen shkala joq. Bul Almaty qalasyna da qatysty.

Áleýmettik qoldaý qalaı anyqtalady?

Mınıstrlik ókilderiniń aıtýynsha, azamattardyń muqtajdyǵyn baǵalaý jáne belgili bir áleýmettik qoldaý túrlerin taǵaıyndaý úshin otbasynyń (adamnyń) áleýmettik ál-aýqatyn anyqtaý ádistemesi qoldanylady. Bul ádisteme otbasynyń jaǵdaıyn keshendi baǵalaýdy qamtıdy. Esepteý kezinde tek tabys qana emes, sonymen qatar qaryzdar, múliktiń bolýy, balalar sany, densaýlyq jaǵdaıy jáne basqa da áleýmettik-ekonomıkalyq faktorlar eskeriledi.

Demek, Qazaqstanda azamattardy tek tabys deńgeıi boıynsha qarjylyq mártebege bólýdiń biryńǵaı resmı kestesi joq. Alaıda, Ulttyq statısıka búrosy toqsan saıyn halyqty tabysyna qaraı 10 teń topqa bóledi. Birinshi top – eń tómengi tabysy bar halyqtyń on paıyzy, sońǵy top – eń joǵary tabysy bar halyqtyń on paıyzy.