InfoHub Logo

Qazaqstannyń 11 qalasynda 2025 jyly aýa sapasynyń nasharlaýy tirkeldi. Ekologıa mınıstrliginiń habarlaýynsha, bul jaǵdaıǵa zaýyttar emes, avtokólikter, jeke sektor jáne shaǵyn bıznes sebep bolyp otyr.

Bul týraly Infohub.kz aqparat agenttigi habarlaıdy.

Almatydaǵy jaǵdaı

«Qazgıdromettiń» málimetinshe, eń kúrdeli ahýal Almaty, Óskemen, Qaraǵandy, Temirtaý jáne Aqtóbe qalalarynda baıqalǵan. Mysaly, Almatydaǵy lastanýdyń 60%-y kólikterden, al 12%-y jeke úıler men shaǵyn qazandyqtardan shyǵady.

«Lastanýdyń aıtarlyqtaı úlesi shaǵyn kózderge – avtokólikterge, jeke sektorǵa jáne shaǵyn bıznes nysandaryna tıesili», – dep habarlady vedomstvo.

Jańa ekologıalyq sharalar

Mınıstrlik ákimdikterge Beıjińniń tájirıbesin eskere otyryp, 2026–2028 jyldarǵa arnalǵan jańa ekologıalyq sharalardy pysyqtaýdy tapsyrdy. Josparda jeke sektordy gazdandyrý, qazandyqtar men kafelerde qatty otyn qoldanýǵa tyıym salý, kólikti elektr energıasy men gazǵa kóshirý, ónerkásip aımaqtarynyń aınalasyna jasyl beldeýler qurý jáne qalalardy ekologıalyq aımaqtarǵa bólý qarastyrylǵan.

Buǵan deıingi jaǵdaılar

Buǵan deıin Óskemen qalasyn ýly tuman basyp, halyqtyń densaýlyǵyna zıan keltirgeni týraly habarlanǵan bolatyn. Aqpan aıynyń basynda kúkirtsýtek, kúkirt dıoksıdi jáne kómirtegi totyǵy boıynsha normadan asýlar tirkeldi. Adamdar kóshege medısınalyq maskalarmen, tipti gaztutqyshtarmen shyqty.

Almatydaǵy jaǵdaı da máz emes. «Almaty Air Initiative» ekologıalyq qorynyń habarlaýynsha, Almatyda bir jyl ómir súrý densaýlyqqa zıandylyǵy boıynsha bir jylda 518 temeki shekkenmen teń (keıbir aýdandarda tipti 700–800 temekige deıin).