InfoHub Logo

Reseılik belgili telejúrgizýshi ári RT arnasynyń bas redaktory Margarıta Sımonán uzaq ýaqyt boıy emdelip, kópshilik kózinen tasada júrgennen keıin alǵash ret jurt aldyna shyqty. Buǵan deıin ol óziniń sút bezi qaterli isigimen aýyrǵanyn jáne ota jasalǵanyn ashyq aıtqan bolatyn.

Bul týraly Infohub.kz aqparat agenttigi habarlaıdy.

Sımonán emdeý kýrsynan, sonyń ishinde hımıoterapıa men sáýlelik terapıadan ótip, densaýlyǵynyń álsireýine baılanysty ýaqytsha qoǵamdyq is-sharalardan bas tartqan edi. Jaqynda ǵana onyń jaǵdaıy jaqsaryp, týǵan qalasy Krasnodarda «Qurmetti turǵyn» ataǵymen marapattaldy. Bul onyń emdeýden keıingi alǵashqy resmı shyǵýy boldy. Kópshiliktiń nazaryn aýdarǵan bir jaıt – Sımonánnyń bul joly alǵash ret parıksiz kórinýi.

Sımonánnyń Qazaqstanǵa qatysty burynǵy pikirleri

Margarıta Sımonánnyń emdelýinen keıingi jańalyqtarmen qatar, onyń buǵan deıingi Qazaqstanǵa qatysty aıtqan daýly sózderi de eske tústi. Bir suhbatynda ol Reseı áskeriniń Ýkraına men Sırıadaǵydaı, qajet bolǵan jaǵdaıda Qazaqstandaǵy «barmaleılermen» kúresýge daıyn bolýy kerektigin aıtqan.

«Eger biz Ýkraına men Sırıadaǵydaı, qajet bolǵan jaǵdaıda Qazaqstandaǵy qandaı da bir “barmaleılermen” kúresý múmkindigine ıe bolsaq, men óte baqytty bolar edim», – degen pikirin ol Empatıa Manýchı baǵdarlamasyna bergen suhbatynda bildirgen. Sarapshylar bul sóz arqyly Sımonánnyń Qańtar oqıǵasy kezinde Qazaqstanǵa kelgen UQSHU áskerine jáne sol kezde «terrorıst» dep atalǵan toptarǵa meńzegenin joramaldaıdy.