InfoHub Logo

AQSH Qazaqstanǵa reseılik munaıdy Qytaıǵa tranzıtteýge ruqsat bergen lısenzıany 2027 jyldyń naýryzyna deıin uzartty. Bul týraly Bloomberg agenttigi habarlady.

Bul týraly Infohub.kz aqparat agenttigi habarlaıdy.

Tranzıt jalǵasady

AQSH Qarjy mınıstrligimen kelissózder júrgizgennen keıin bul ruqsat 2027 jyldyń 19 naýryzyna deıin uzartyldy. Bul lısenzıa Qazaqstanǵa jahandyq munaı naryǵyndaǵy turaqsyzdyqqa qaramastan, reseılik munaı kólemin Qytaıǵa tasymaldaýdy jalǵastyrýǵa múmkindik beredi.

Buǵan deıingi ruqsat bıyl sáýirge deıin jaramdy bolǵan edi. Qazirgi tańda Qazaqstan jylyna shamamen 10 mıllıon tonna reseılik munaıdy Qytaıǵa tranzıtteıdi. Bul táýligine shamamen 200 myń bareldi quraıdy. Taraptar bul kólemdi jylyna 12,5 mıllıon tonnaǵa deıin arttyrý múmkindigin talqylap jatyr.

Qazaqstan úshin mańyzy

Munaı-gaz salasynyń sarapshysy Asqar Ismaılovtyń aıtýynsha, AQSH-tyń arnaıy lısenzıasynsyz reseılik munaı tranzıtine tyıym salynar edi. 2025 jyly «Rosneft» sanksıaǵa ilikkennen keıin, onymen kez kelgen operasıalar, sonyń ishinde Qazaqstan men «Qaztransoıl» úshin de táýekeldi boldy.

Ótken jyldyń qarasha aıynda Qazaqstan Energetıka mınıstrligi AQSH-qa munaı tranzıtin saqtap qalý úshin arnaıy ruqsat surap júgingen bolatyn. Aldymen ony 2026 jyldyń sáýirine deıin bergen, endi uzartyldy.

«Bul Qazaqstanǵa ne beredi? Tranzıtteletin munaı kólemi jylyna shamamen 10 mıllıon tonnany quraıdy. Qazir 12,5 mıllıon tonnaǵa deıin ósýi talqylanýda. «Qaztransoıl» budan jylyna 150-190 mıllıon dollar tabys tabady. Al AQSH úshin bul munaı baǵasynyń ósýin tejeýdiń taǵy bir quraly bolyp tabylady, óıtkeni naryq qosymsha munaı kólemimen qamtamasyz etiledi», - dep túsindirdi Ismaılov.