InfoHub Logo

17 jasqa deıingi Qazaqstan jasóspirimder quramasy Mınskidegi «Damý Kýbogy» halyqaralyq týrnırinde toptyq kezeńdi sátti aıaqtap, qola júlde úshin talasqa shyǵady. Komanda toptaǵy sońǵy oıynynda Tájikstandy 3:1 esebimen tize búktirip, A tobynda ekinshi oryndy ıelendi.

Bul týraly Infohub.kz aqparat agenttigi habarlaıdy.

Týrnırdegi jol

Tájikstanmen ótken kezdesýde alǵashqy mınýtta gol jiberip qoıǵanyna qaramastan, qazaqstandyqtar rýhtaryn túsirmedi. Oıynnyń birinshi taımynda QFA Akademıasynyń oıynshysy Anýar Tólendi esepti teńestirdi (1:1). Mach teń aıaqtalady dep turǵanda, oıynnyń sońǵy bes mınýtynda «Qaırattyń» oıynshysy Islam Raqym komandasyn alǵa shyǵardy. Al oıynnyń aıaǵynda onyń áriptesi Roman Chernomores taǵy bir gol soǵyp, komandanyń jeńisin nyǵaıtty.

Toptaǵy ornymyz

Qazaqstan quramasy toptaǵy eki oıynda da 3:1 esebimen Tájikstandy jáne Mınskini jeńip, al Belarýs quramasynan 0:2 esebimen utylyp qaldy. Osylaısha, Baýyrjan Saǵandyqtyń shákirtteri A tobynda ekinshi oryndy ıelendi.

Qola úshin tartys

Týrnırdiń sońǵy kúninde bizdiń komanda V tobynda ekinshi oryn alǵan Ózbekstan quramasymen qola medal úshin kezdesedi. Al altyn júlde úshin Belarýs pen Reseı quramalary talasady. Besinshi oryn úshin Tájikstan men Ázirbaıjan, jetinshi oryn úshin Mınsk pen Belarýs (U16) komandalary synǵa túsedi.

«Damý Kýbogy» – jas talanttarǵa alań

«Damý Kýbogy» týrnıri 2005 jyldan beri jyl saıyn Mınskide ótip keledi. Qazaqstandyq fýtbolshylar bul týrnırge bıyl jetinshi ret qatysyp otyr. Buǵan deıin 2021 jáne 2023 jyldary komanda ekinshi oryndy ıelengen bolatyn.

Eýropa chempıonatyna daıyndyq

Bul týrnır – Qazaqstannyń 17 jasqa deıingi quramasynyń Eýropa chempıonatynyń irikteý kezeńine daıyndyǵynyń bir bóligi. Sáýir aıynyń sońynda jas fýtbolshylarymyz Danıa, Chehıa jáne Avstrıa quramalarymen birge Eýropa chempıonatyna jalǵyz joldamany sarapqa salady. Ótken jyly qazaqstandyqtar alǵash ret irikteýdiń ekinshi kezeńine shyqqan bolatyn.

Eýropanyń úzdik 8 jasóspirimder (U17) quramasy qatysatyn fınaldyq kezeń 25 mamyr men 7 maýsym aralyǵynda Estonıada ótedi.