InfoHub Logo

«QazAvtoJol» ulttyq kompanıasynyń enshiles mekemesinde iri kólemde qarjy jymqyrylǵany anyqtaldy. Sot burynǵy basshyny kináli dep tanyp, jaza kesti.

Bul týraly Infohub.kz aqparat agenttigi habarlaıdy.

Jumys istemegenderge jalaqy tólengen

Máselen, 2024 jyly Shyǵys Qazaqstan fılıalyndaǵy «QazAvtoJolServıs» JSHS-ne eshqandaı jumys atqarmaǵan adamdar jumysqa turǵyzylǵan. Alaıda, olarǵa aı saıyn jalaqy eseptelip, aqsha zańsyz túrde qoldy bolǵan.

Qyzmettik tekserýden keıin bul derekter Sybaılas jemqorlyqqa qarsy qyzmetke joldandy. Tergeý barysynda bul iske fılıaldyń burynǵy dırektorynyń qatysy bar ekeni anyqtaldy.

Sot úkimi

İs sotqa jiberilgennen keıin, 2025 jyldyń jeltoqsanynda Óskemen qalasyndaǵy sot burynǵy dırektordy kináli dep tanyp, 2 jyl 9 aıǵa bas bostandyǵyn shekteý týraly úkim shyǵardy. Alaıda, keıinnen prokýratýranyń narazylyq haty boıynsha jaza 3 jyl 6 aıǵa deıin qataıtyldy.

Odan bólek, keltirilgen 6,7 mıllıon teńge shyǵyn óndirildi. Kompanıa málimetinshe, aqsha tolyq kólemde qaıtarylǵan.

«QazAvtoJol» kompanıasy sybaılas jemqorlyqqa «múldem tózbeýshilik» saıasatyn ustanatynyn jáne ishki baqylaýdy kúsheıtetinin habarlady.