InfoHub Logo

Buryn sottalǵan Perızat Qaıratqa tıesili bolǵan Mercedes-Benz S 450 avtokóligi memleket menshigine ótti. Bul týraly elektrondy saýda portalyndaǵy málimetter rastady.

Bul týraly Infohub.kz aqparat agenttigi habarlaıdy.

7 sáýirde elektrondy saýdada Perızat Qaıratqa tıesili bolǵan avtokólik memlekettik organdardyń balansyna bekitildi. Saýdanyń mártebesi «ótti» dep kórsetilgen.

Kóliktiń sıpattamasy

Atalǵan kólik 2024 jylǵy, qara tústi, memlekettik nómiri 777KPK01. Qujattarǵa sáıkes, akýmýlátordyń zarády taýsylǵandyqtan, tehnıkalyq jaǵdaıyn tekserý múmkin bolmady. Avtomobılmen birge Pandora sıgnalızasıasy bar kilt beriledi.

İshinde aq bylǵary salony bar. Kóliktiń baǵasy shamamen 79,4 mıllıon teńge dep baǵalanǵan. Sondaı-aq, kólikke arest túrinde shekteýler qoıylǵany aıtylady.

Qaırattan taǵy ne tárkilendi?

2025 jyldyń qyrkúıeginde Qarjy monıtorıńi agenttigi Perızat Qaırattan tárkilengen múlikterdiń aýksıonǵa shyǵarylatynyn habarlaǵan bolatyn. Olardyń qatarynda Vela Village kotej qalashyǵyndaǵy jeke úı, Akbulak Riviera, Sensata Plaza, Highvill Ishim Gold jáne «Kók Jaılaý» turǵyn úı keshenderindegi birneshe páter men turaq oryndary bar.

Sondaı-aq, Mercedes-Benz S450 (2024 jylǵy), Lexus LX 600, Mercedes-Benz EQE jáne Haval H6 GT sıaqty qymbat kólikter de tárkilendi. Buǵan qosa, memleketke gúl bıznesindegi 100 paıyz úles, 97 mıllıon teńgeden astam jáne 22 myń dollar qolma-qol aqsha ótkizildi.

Perızat Qaırattyń isi

Perızat Qaırat – qazaqstandyq qoǵam qaıratkeri jáne kásipker. Ol úsh jyl boıy «Biz birgemiz Qazaqstan 2030» qaıyrymdylyq qoryn basqardy.

2024 jyldyń qarasha aıynda Qaırat 1,5 mıllıard teńgeni jymqyrdy degen kúdikpen ustaldy. Tergeý nusqasy boıynsha, bul qarajattyń bir bóligi sý tasqynynan zardap shekkenderge kómek retinde jınalǵanymen, onyń bir bóligi Perızat Qaırattyń jeke shyǵyndaryna – elıtalyq jyljymaıtyn múlikke, avtokólikterge jáne saıahattarǵa jumsalǵan.

Qor qarajatyn qolma-qol aqshaǵa aınaldyrý úshin Qaırat týystaryn tartqan. Onyń anasy Ǵaını Alashbaeva da is boıynsha sybaılas retinde ótti.

Keıinirek Perızat Qaırat Palestına turǵyndaryna jınalǵan qarajatty urlady degen kúdikke ilindi.

2025 jyldyń naýryzynda onyń «Biz birgemiz Qazaqstan 2030» qory sot sheshimimen taratyldy.

16 shildede is boıynsha jábirlenýshiler sotqa habarlasyp, áleýmettik jelidegi jarnamalarǵa aldanyp, qaıyrymdylyq kómek kórsetýge keliskenderin aıtty. Sotta tergeý áreketteri barysynda tárkilengen múlikterdiń tizimi de jarıalandy.

Nátıjesinde, Perızat Qaırat ortasha qaýipsizdik mekemesinde 10 jyl bas bostandyǵynan aıyryldy. Onyń anasy Ǵaını Alashbaeva 7 jylǵa sottaldy.