InfoHub Logo

Kúz. Dýal ústinen al qara kók tolqyndy teńizge kóz tigip turmyz. Annan-mynnan keme jelkenderi aǵarańdaıdy. Batqan kúnniń jalqyny altyn shapaqqa boıaǵan Shvesıanyń bıik jaǵalaýlary alystan qaraýytady. Artymyzdaǵy dýaldyń tik jarynan jyra bastalady, oǵan qulashyn keń jaıyp ósetin tamasha aǵashtar otyrǵyzylǵan. Onyń sarǵaıǵan japyraqtaryn jel kóterip, izinshe jerge tósep jatyr. Dýaldyń baýraıyndaǵy aǵash sharbaqty qorshaýdyń ishinde surqaı úı kózge shalynady. Onyń syrtynda saqshy júr. Sharbaqtyń ar jaǵy netken qapas, netken qarańǵy! Alaıda, ǵımarattyń ózi, onyń terezeleri torlanǵan kameralary tipti sumdyq qapas dese qapas. Onda tutqyndar, ejelgi qylmyskerler qamalǵan.

Batqan kúnniń sáýlesi kameranyń jalańash qabyrǵalaryna túsip tur. Kúnniń zulymdy da, izgini de alalamaı sáýlesin túsire beretinin qaıtersiń! Júzi jabyǵyńqy, yzǵarly tutqyn osynaý túk jylýy joq kún sáýlesine kektene kóz tigip, qadala qalǵan. Kenet tereze toryna áldebir qus kelip qondy. Qus ta zulymdy da, izgini de alalamaı án salatynyn qaıtersiń! Onyń áni qysqa qaıyrymdy: «Shıyq-shıyq!» bar bolǵany osy ǵana! Alaıda, qustyń ózi ázir eshqaıda ushyp keter emes. Ol, mine, qanatyn qomdap, qaǵyp, qaýyrsyndaryn tazalap, silkinip aıdaryn tikireıtip áýre... Aıaǵy kisendeýli qylmyskerdiń oǵan qaraǵan saıyn ashýly júzi birte-birte jumsaryp, qaıdan, qalaı kelgeninen ózge túgil ózi de beıhabar, qaıdaǵy bir jańa sezim janyn jaılandyra tústi. Bul sezim kún sáýlesi men ana jaqta erkindikte, kóktemde meılinshe mol ósetin fıalkanyń hosh ıisine óte uqsas! Biraq mynaý she? Ańshy syrnaıynyń kóńildi, kúshti daýsy estildi. Qus ushyp ketti, kún sáýlesi sónip barady, kameraǵa qaıta qarańǵylyq tústi. Qylmyskerdiń júregi de tas qarańǵy, biraq qalaı bolǵanda da osy júrekten kún sáýlesi júgirip ótti ǵoı, onyń qustyń saıraýyna ún qosýy osynyń áseri.

Ańshy syrnaıynyń ǵajap sazy sholaq qaırylmaı, shyrqaı, áýendeı berse eken! Keshki jumsaq aýa tym-tyrys. Teńiz aına syndy qımylsyz jatyr.

Aýdarǵan Q. Qurmanǵalıev

---