InfoHub Logo

Qazaqstannyń taǵy bir óńirinde, atap aıtqanda Qostanaı oblysynda munaı izdeý jumystary qolǵa alynady. Bul týraly Indýstrıa jáne qurylys mınıstrligi Geologıa komıteti tóraǵasynyń mindetin atqarýshy Qanat Erýbaev málimdedi.

Jýrnalıserdiń brıfıńte qoıǵan suraǵyna jaýap bergen Qanat Erýbaev: «Djangeldi aýdanynda munaı tabylǵany týraly áńgimeler boldy. Ony áli óndirýge erte me?» degen saýalǵa, munaıdy tabý úshin «perspektıvaly tuzaqtardy» anyqtaý qajettigin aıtty.

«Bul – kúrdeli jumys, biraq ony júrgizý kerek. Bizde Soltústik Torǵaı shógindi baseıni óte úlken. Sonymen qatar, soltústik elderde munaı men gaz óndiriledi. Bizde de sondaı nysandardy tabýǵa jaǵdaı jetkilikti. Sondyqtan biz Qostanaı oblysy aýmaǵynda seısmobarlaý jumystaryn josparladyq», - dep qosty ol.

Komıtet basshysynyń mindetin atqarýshynyń aıtýynsha, jumystar 2026 jyly bastalyp, úsh jylǵa sozylady.

Aıta keteıik, Qazaqstanda munaı negizinen eldiń batys bóliginde óndiriledi. Munda iri ken oryndary men negizgi ınfraqurylym shoǵyrlanǵan. Negizgi munaı óndiretin óńirler – Atyraý, Mańǵystaý, Batys Qazaqstan, Aqtóbe oblystary. Qyzylorda oblysynda da shaǵyn kólemde óndiris bar.

Esterińizge sala keteıik, jaqynda ótken úkimettiń keńeıtilgen otyrysynda Prezıdent Qasym-Jomart Toqaev munaı salasyndaǵy kúrdeli jaǵdaıdy atap ótken bolatyn. Onyń aıtýynsha, Qazaqstanda jylyna shamamen 100 mıllıon tonna munaı óndirilse, onyń tek 18 mıllıon tonnasy ǵana elimizde qaıta óńdeledi. Janar-jaǵarmaıǵa suranystyń artýyna baılanysty Prezıdent úkimetke jumys istep turǵan munaı óńdeý zaýyttaryn jańǵyrtýdy jedeldetip, jańa zaýyt qurylysy boıynsha sheshim qabyldaýdy tapsyrdy.