InfoHub Logo

Qostanaı qalasyndaǵy №2 sotynda alaıaqtyq isi boıynsha rezonansty sot otyrysy ótti. Sotta «Semá» turǵyn úı kesheninde úshinshi úıdi salýǵa ruqsatsyz, azamattardyń aqshasyn tartqan «Bolashak Construction Company KZ» JSHS dırektory jaýapqa tartyldy.

Bul týraly Infohub.kz aqparat agenttigi habarlaıdy.

Tergeý nusqasy boıynsha, qurylys kompanıasynyń basshysy 28 adam men bir kásipkerdi aldap, 162 mıllıon teńgeden astam qarajatty ıelengen. Azamattar bolashaq baspanalaryna aqsha salǵanymen, úılerine qonystana almaǵan.

Alaıaqtyq áreketi

Sotqa deıingi tergeý barysynda anyqtalǵandaı, kúdikti 2022 jyldan 2024 jylǵa deıingi aralyqta «Semá» turǵyn úı kesheninde úlestik qurylysqa qatysý jeleýimen azamattardan aqsha jınaǵan. Alaıda, ol tıisti ruqsat qujattarynsyz jumys istegen.

Azamattarmen páterler men komersıalyq úı-jaılardy satýdyń aldyn ala sharttary jasalǵan. Jobanyń zańdylyǵyna sendirý úshin kúdikti áleýmettik jelilerde jarnamalyq naýqan júrgizip, Qostanaı qalasynda keńse de jalǵa alǵan.

Sot úkimi

Qylmystyq kodekstiń 190-baby, 4-bóligi, 2-tarmaǵy («Alaıaqtyq, ıaǵnı aldaý nemese senimdi teris paıdalaný arqyly jasalǵan bóten múlikti urlaý») boıynsha aıyptalǵan azamatqa sot 6 jyl 8 aı bas bostandyǵynan aıyrý jazasyn taǵaıyndady. Alaıda, Qazaqstan Konstıtýsıasynyń 30 jyldyǵyna oraı qabyldanǵan amnıstıaǵa baılanysty jaza merzimi qysqartyldy.

«Qorytyndy jaza retinde 5 jyl 4 aı bas bostandyǵynan aıyrý taǵaıyndalsyn. Sonymen qatar, qurylys salasynda qyzmet kórsetetin komersıalyq uıymdarda basshylyq qyzmetterdi atqarý quqyǵynan 5 jylǵa aıyrylsyn. Taǵaıyndalǵan jaza shartty bolyp eseptelsin. Taǵaıyndalǵan merzim boıy baqylaýda bolady», — dep sot úkimin oqydy.

Sot sheshimi boıynsha, keltirilgen shyǵyn sotqa deıingi tergeý kezinde ótelgeni atap ótildi.