InfoHub Logo

QR Prezıdenti arhıvi «Muraǵat jáne qoǵam: Táýelsizdik qundylyqtary» sharasy aıasynda 1930 jylǵy asharshylyq qurbandarynyń málimetter bazasyn jasamaq. Bul týraly «Asharshylyq» jobasynyń tujyrymdamasyn talqylaý barysynda belgili boldy.

Kezdesýge tarıhshylar: Talas Omarbekov, Qaıdar Aldajumanov, Svetlana Smaǵulova, Beıbit Qoıshybaev, Aıjamal Qudaıbergenova, jazýshy Smaǵul Elýbaev qatysty. 

Sharanyń ashylýynda sóz sóılegen QR Prezıdenti arhıviniń dırektory Borıs Japarov Qazaqstannyń tarıhyn zertteýde asharshylyq qurbandarynyń bazasyn qurý basty jumys ekendigin atap ótti.

Jobany uıymdastyrýshylar bul jumysty ǵalymdar men tarıhshylardyń, muraǵatshylardyń kómeginsiz júzege asyrý múmkin emestigin aıtty.
«90 jyldary akademık Manash Qozybaevtyń bastamasymen bul baǵytta ushan-teńiz jumys atqaryldy. Konferensıa, dóńgelek ústelder, ǵylymı zertteý jumystary jasaldy. Muraǵat bastamasy qoǵam arasynda úlken qoldaý týǵyzary sózsiz. Óıtkeni, bul tragedıa barlyq qazaqty sharpydy. Ǵylym salasy da buǵan jumyla atsalysýy kerek»,- dedi Beıbit Qoıshybaev.

Óz kezeginde jazýshy Smaǵul Elýbaev asharshylyq qurbandarynyń sany da naqty emestigin aıtty. Onyń aıtýynsha, bul tarıhı aqtańdaqtardy qalpyna keltirý úshin tek zertteýmen ǵana aınalyspaı, asharshylyq qurbandaryna eskertkish ornatý kerek.

Aıjamal Qudaıbergenovanyń paıymdaýynsha, ortaq málimetter bazasy qazaq halqy tarıhynyń zerttelmeı qalǵan aqtańdaqtaryn qaıta jańǵyrtýǵa septigin tıgizbek. Ol úshin tek memlekettik emes, jergilikti aýdandyq muraǵattarda saqtalǵan qujattardy zertteýdi de qolǵa alý kerek.

Otyrysqa qatysýshylar «Asharshylyq» jobasyn júzege asyrý úshin arnaıy jumys tobyn qurýdy uıǵardy. Oǵan tarıhshylar men muraǵat qyzmetkerleri enbek.