InfoHub Logo

Kúz kúnderiniń biri. Aspan bultty. Anda-sanda sebezgilip alyp basylady. Ázirge aıyǵatyn túri joq.

Edil men Emil úıde. Demalys bolǵanymen syrtqa shyǵýǵa tıym salynǵan. Sebebi — jańbyr. Jer laısań, oınaıtyn oryn joq. Mundaıda basqa balalar da syrtqa shyqpaıdy. Qamalyp úıde otyrady.

Ekeýi kúndegisindeı erte oıanǵan. Qazir ekinshi qabattaǵy ortaq bólmelerinde ózderine tıesili jumyspen aınalysýda. Bir-eki saǵat ǵalamtor oıyndaryn oınap edi, odan endi jalyǵa bastady. Tipti, kishkene Emil ornynan baǵana-aq turyp ketipti.

— Aǵa, anany qara… — dedi bir kezde tereze jaqtan aıǵaılap.

— Ol ne? — dep jalt buryldy Edil eleń etip. Emildiń úni nazar aýdarmasyna qoımastaı edi.

— Áne, qarashy anaǵan… alma — dedi aýlaǵa qaraǵan artqy terezege taqaý turǵan Emil odan saıyn jaqyndap.

Ornynan jaı turyp kelip:

— Qane… — dep nemquraıly qaraǵan Edil qol sozym jerde turǵan qyp-qyzyl qos almany kórgende kózi janyp ketti.

— Qandaı ádemi, á? — dedi qyzyǵyp. — Ózderi tipti úlken eken.

— Iá. Ekeý, — dedi Emil taǵatsyzdana tamsanyp.

— Qalaı aldyq ony endi?

— Ras, á… qalaı alamyz?

Qos alma kútpegen olja edi. Kúzdik jıyn-terim aıaqtalǵaly biraz kún bolǵan. Japyraqtardyń arasyna jasyrynyp myna ekeýi qalyp qoıypty. Oılamaǵan jerden kózge túsip, onsyz da zerigip otyrǵan balalarǵa jaqsy ermek tabyldy.

— Qalaı aldyq? — dedi Edil qatty oılanyp.

İske shynymen-aq kiriskeni anyq baıqaldy. Aǵasynyń bir amal tabatynynan úmittengen Emil de onyń sońynan qalmaı aınalsoqtap júr.

— Qalaı alamyz, aǵa, a… qalaı alamyz? — dep qoıady anda-sanda.

— Sony ózim de bilmeı turmyn! — dedi Edil jelkesin qasyp. — Taptym! — dedi ol izinshe ornynan sekirip ketip. — Taptym…

— Ne isteımiz, aǵa? — dedi Emil túkke túsinbese de aǵasynyń betine kúlimdeı qarap.

— Bylaı isteımiz, — dedi aǵasy ile oǵan burylyp. — Júr! — dedi artynsha buıryq berip. — Meniń artymnan er!

Ekeýi júgirip astyńǵy qabatqa tústi. Qudaı ońdaǵanda eshkim joq eken. Tike baryp asúıge kirdi. Onda da adam kórinbedi. Muzdatqyshtyń artynda, buryshta turǵan kerneıdeı uzyn aq qubyrdy alyp shyqty. Ony asúıdiń bitele beretin sý qubyryn aýystyrýǵa keshe ákep qoıǵan bolatyn. Áli ornynda eken. Ekeýi eki basynan kóterip, ústige alyp shyqty. Terezeni ashyp, qubyrdy syrtqa shyǵaryp kórip edi, kerek jerge jeterdeı uzyn eken. Bireýi ortan belinen, ekinshisi kelesi basynan ustap, almaǵa qaraı jaqyndatty. Artynan aýzyn jemiske kıgizip alyp, joǵary-tómen qozǵap qalyp edi, sol sát sabaǵynan úzilgen almalar, qubyr ishimen beri qaraı syrǵı jóneldi. Sol kúıi aǵyp kelip, aıaqtarynyń astyna top ete qaldy.

Qýanyp ketken Emil tura júgirmek bolyp yńǵaılanyp edi:

— Toqta! — dedi Edil ony bógep. — Asyqpa. Aldymen mynany aparyp ornyna qoımaımyz ba? Ákem kórse ursady ǵoı.

— Ras, á, — dedi Emil óziniń shamaly asyǵyp ketkenin sonda baryp ańdap, yńǵaısyzdanyp. — Kettik, — dedi sosyn qushaǵyndaǵy qubyrdy qaıta kóterip.

---