InfoHub Logo

Almaty melekettik qýyrshaq teatry aǵymdaǵy jyldyń aqpan aıynyń 15-i kúni qazaqstandyq boksshy, Sıdneı Olımpıadasynyń jeńimpazy Bekzat Sattarhanovtyń batyl rýhyna arnalǵan «Chempıon» qoıylymynyń premerasyn teatr súıer qaýymnyń nazaryna usynady. Armanǵa degen adaldyq, maqsatqa jetý jolyndaǵy qajyrly eńbek, eli men jerine degen súıispenshilikti nasıhattaıtyn qoıylym jas jetkinshekterdi qaısarlyqqa, ójettilikke, batyldyqqa, shydamdylyqqa tárbıeleıdi.

Qýyrshaq teatry sahnasynda tuńǵysh ret usynylatyn qoıylymnyń ereksheligi – bolmysy bólek boks sheberi, ult maqtanyshy, nebári 20 jyldyq ǵumyrynda 143 jekpe-jek ótkizgen birtýar boksshynyń asqaq rýhyn qýyrshaq obrazynda kórsetý.

Kınematografıa elementterin utymdy paıdalana otyryp, ár dáýirdegi qazaq halqynyń jeńisi men jeńilisin túrli sımvolıkalyq obrazdar arqyly tarıhı faktilermen baılanystyra qabystyrylǵan qoıylym Bekzat Sattarhanovtyń kúresi arqyly kúlli ult tarıhyn baıandaıdy.

Jasóspirimder aýdıtorıasyna arnalyp daıyndalǵan drama janryndaǵy qoıylymnyń rejıseri – Qazaqstannyń eńbek sińirgen qaıratkeri, teatr ardageri Orazáli Aqjarqyn-Sársenbek, avtory – Halyqaralyq «Alash» ádebı syılyǵynyń júldegeri, dramatýrg Álibek Baıbol, sýretshisi – Iýlıa Chernova, Anýar Búrkitbaev, mýzykamen kórkemdeýshi – Baqbergen Baıshyǵash, horeografy – Anna Soı.

Eshqashan umytylmaıtyn batyr beıne Bekzat Sattarhanovtyń ómiri men sporttaǵy jarqyn jolyna arnalǵan qoıylym barsha qazaq eline ulttyq rýh, bıik patrıottyq sezim, jalyndy jiger syılap qana qoımaı, Almaty Memlekettik qýyrshaq teatry repertýarynda oıyp oryn alatyn taǵylymdy da maǵynasy tereń týyndy bolmaq.

Sondaı-aq, kishkentaı búldirshinderdi adamı asyl qasıetterge tárbıelep, izgilikke úndeıtin teatr ujymy aqpan aıynda álemge áıgili «Etik kıgen mysyq» ertegisiniń de premerasyn usynbaq.

Teatrda júzdeseıik!