InfoHub Logo

Bir qumyrsqa óz ıleýinde tobynan bólinip, sol mańdaǵy ara, qońyz sekildi jándiktermen dos bolypty.

Jem izdep shyqqan qumyrsqa jol ústinen bir dán taýyp alypty. Jalǵyz ózi ári-beri áýrelenip, dándi ornynan qozǵalta almapty. Sonan soń kómek suraý úshin álgi qanatty dostaryn izdeıdi.

Bir ýaqytta gúlden-gúlge qonyp, shyryn jınap júrgen araǵa jolyǵady

– Dosym, bir dán taýyp alyp edim, jalǵyz ózim kótere almaǵanym. Maǵan kómektesip jibershi, – dep ótinedi.

– Kórmeı tursyń ba, men de jumys istep jatyrmyn ǵoı, – dep, ara kónbeı qoıypty. Solaıy solaı ǵoı, meıli dep, qumyrsqa ári júrip ketipti. Ol endi qońyzdy taýyp alady.

Ol mán-jaıdy aıtyp, kómek surapty.

– Sen úshin óz eńbegimdi esh qyla almaımyn, – dep, qońyz yzyńdap ushyp kete barady.

Dostarynan kúder úzgen qumyrsqa muńaıyp qaıtyp kele jatady. Jolda óziniń ıleýlesterimen ushyrasyp qalady. Olar munyń túrin kórip:

– Ne istep júrsiń? – dep, jónin suraıdy.

Jalǵyz qumyrsqa óziniń basynan keshkenin aıtyp beredi:

– Jalǵyzdyq degen sol, – dep, ıleýlesteri jubatady da qumyrsqanyń dánin kóterisip, ári alyp ketedi. Qumyrsqa úıirine qaıta qosylady.

«Jańa dostyń qadiri eski dosqa jetpeıdi» degen eken sonda bir kári qumyrsqa.

---