InfoHub Logo

Gazet árbir maqalasymen halyqtyń quqyqtyq sanasyn arttyryp, zańdy bilýine atsalysty, Táýelsizdiktiń alǵashqy kezeńderinde elimizde bolyp jatqan saıası oqıǵalarǵa, quqyq salasyndaǵy ózgeristerge aıryqsha ún qosty. Gazette QR Prezıdentiniń Jarlyqtary men ókimderi, halyqqa Joldaýlary, QR Parlamenti qabyldaǵan zańdar, Úkimet qaýlylary jarıalanady. Kólemi 4 baspa tabaq. Taralymy 17000 dana(sol kezdegi). Búginde jalpy taralym - 40640. Irak Elekeev «Zań gazetin ashý armanymyz edi» atty maqalasynda: «Sonda ǵoı «quqyq» degen sózdiń alǵash qoldanysqa engeni. Ózimizdiń buryn zań jasaý tájirıbemiz bolmaǵandyqtan zań termınderin qazaqy qalypqa túsirý ońaı bolǵan joq. Pikir qaıshylyǵy, kózqarastardyń sáıkespeýi jıi oryn alatyn. Solardyń bir parasy osy «quqyq» sózi tóńireginde órshidi. «Bul qaıdan shyqqan sóz? Quqyq dep tutyǵýdyń qajeti qansha?» degen sózder aıtyldy. Alaıda, osy sózdiń qoldanysqa enýine qarsy bolǵan nebir myqty til salasynyń mamany men ǵalymy «pravo» degen orys sóziniń «quqyqtan» artyq balamasyn taba almady. Aqyry, osy sóz zańnyń tól termıni sekildi qoldanysqa enip ketti». Parlament Májilisinde talqylanyp jatqan árbir zańdy gazet betinde sarapqa salyp,  Táýelsizdiktiń alǵashqy jyldary zań termınderiniń qalyptasýyna yqpal etken basylym jyl ótken saıyn qanatyn keń jaıyp keledi. Ýaqyt óte «Zań» jáne «Femıda» jýrnaldarymen qatary tolyqqan korporasıa ýaqyt kóshinen qalmaı, Zanmedia.kz saıtyn da ómirge ákeldi. Ádildik izdegen talaı jannyń aryz-shaǵymdaryn tıisti oryndarǵa jetkizip, zańdy sheshimin tabýyna yqpal etip kele jatyr.

Gazettiń alǵashqy redaktory Marat Toqashbaev: «Búginde elimizdiń buqaralyq aqparat keńistiginde óz orny bar osynaý basylymdy qurýǵa, alǵashqy nómirinen bastap gazetti úsh jyl basqarý baqyty maǵan násip bolypty. Bul basylymnyń dúnıege kelýine muryndyq bolǵan, qıyn sátterdiń bárinde qol ushyn berip otyrǵan elimizdegi quqyqtyq reformalardyń atasy, Táýelsiz Qazaqstannyń tuńǵysh Ádilet mınıstri, kórnekti zańger, marqum Naǵashybaı Sháıkenov edi. Demokratıanyń atasy sanalatyn Tomas Djefferson «Tabıǵat zańdaryna qaıshy zańdar qabyldaý – artynan ózimiz olardy jazalaıtyndaı qylmystar týǵyzý» degen eken. Gazet óz qyzmetinde memleketti tek halyqqa paıdaly zańdar qabyldaýga shaqyrdy. Ár azamatty óz quqyǵyn bilýge úndedi. Quqyqtyq turǵydan shólirkegen oqyrmanǵa quqyqtyq káýsarlardan dám tatýǵa múmkindik berdi» deıdi.

Gazettiń mynadaı aıdarlary bar: «Búgin», «Quqyq», «Áleýmet», «Qazyna», «Advokat», «Bıik minber», «Demografıa», «Alqa», «Ashyq áńgime», «Oqyrman hattary», «Zań tápsir», «Bezben», «Qoǵam», «Tórtinshi bılik», «Aımaq», «Shartarap», «İzkeser», «Rýhanıat», «Sońǵy bet», «Sport», «Eksklúzıv», «Normatıvti quqyqtyq aktiler». Elimizdiń saıası, áleýmettik, ekonomıkalyq, mádenı, eń bastysy – quqyqtyq ómirindegi taqyryptardy arqaý etken maqalalar “Zań gazeti” basylymynyń turaqty oqyrmandaryn qalyptastyryp, qazaqstandyq jýrnalısıka salasynda óz ornyn aıshyqtap berdi.

---