InfoHub Logo

Qytaıdyń Henan agrarlyq ınvestısıalyq toby Soltústik Qazaqstan oblysynda «Qazaqstan-Qytaı agrarlyq tehnologıalar jáne eksporttyq damý tehnoparki» atty jobany iske asyrýda. Bul bastamaǵa shamamen 10 mıllıon dollar ınvestısıa salynady dep josparlanýda.

Bul týraly Infohub.kz aqparat agenttigi habarlaıdy.

Tehnopark ınfraqurylymy men maqsattary

Jobanyń negizgi alańy M. Qozybaev atyndaǵy Soltústik Qazaqstan ýnıversıtetiniń 61 gektar jeri bolady. Alǵashqy kezeńde Qytaı tarapy qoımalar, ǵylymı-ákimshilik ǵımarattar, jataqhanalar jáne zamanaýı jylyjaı keshenderi sıaqty ınfraqurylymdy qarjylandyrady. Ýnıversıtet bolsa, jobany ǵylymı turǵydan qoldaýdy qamtamasyz etedi.

Jobanyń basty baǵyttary egin seleksıasy men tuqym sharýashylyǵyn damytý, ónimdilikti arttyrý, sondaı-aq eginshiliktegi mehanızasıa, avtomattandyrý jáne sıfrlyq tehnologıalardy engizý bolyp tabylady. Buǵan qosa, aýyl sharýashylyǵy ónimderin tereń óńdeýdi damytý da joba aıasynda qarastyrylǵan.

Qazaqstandy tańdaý sebebi

Ýnıversıtet ókilderiniń aıtýynsha, qytaılyq tarap Qazaqstanǵa deıin Ózbekstan, Qyrǵyzstan jáne Malaızıa sıaqty birqatar elderdegi jaǵdaıdy bir jarym jyldaı zerttegen. Nátıjesinde, Soltústik Qazaqstan oblysynyń áleýeti joba úshin qolaıly dep tanylǵan.

Bul joba Henan agrarlyq ınvestısıalyq tobynyń halyqaralyq aýqymyn keńeıtý strategıasynyń bir bóligi bolýy múmkin. Buǵan deıin qytaılyq BAQ-ta atalǵan kompanıanyń Qazaqstannan bólek, Afrıka jáne basqa da aımaqtarda aýyl sharýashylyǵy óndirisi jobalaryn damytyp jatqany týraly habarlanǵan bolatyn.

Qytaılyq toptyń aýqymy

Henan agrarlyq ınvestısıalyq toby – provınsıadaǵy eń iri memlekettik kásiporyndardyń biri sanalady. Jyldyq aınalymy 20 mıllıard dollardan asady jáne onyń quramynda agroónerkásip kesheniniń ártúrli salalarynda jumys isteıtin 170-ten astam enshiles kompanıa bar.