InfoHub Logo

Qyzylorda qalasynda avtokólik ıeleri tehosmotrdan ótý úshin uzaq kezekke turýǵa májbúr. Turǵyndardyń aıtýynsha, qalada tehosmotr júrgizetin ortalyqtardyń sany kúrt azaıyp, tek eki oryn ǵana jumys istep tur. Bul jaǵdaı avtokólik ıeleriniń narazylyǵyn týdyrýda.

Bul týraly Infohub.kz aqparat agenttigi habarlaıdy.

Kólik ıeleriniń aıtýynsha, qazirgi ýaqytta tek eki jerde ǵana tehosmotrdan ótýge bolady: biri – arnaıy HQKO-da, ekinshisi – Jeltoqsan kóshesinde ornalasqan. Kezekke turý tańǵy saǵat 5-ten bastalady. Kúnine eń kóp degende 40-50 kólik qabyldanady. Bul kezekterde jeńil jáne júk kólikteriniń ıeleri de bar.

Júrgizýshiler nege shaǵymdanady?

Júrgizýshilerdiń aıtýynsha, tehosmorty joq kólikterdi anyqtaıtyn kameralardyń belsendi jumys isteı bastaýy jaǵdaıdy odan ári qıyndatyp otyr. Bul jaǵdaı tehosmotrdan ýaqytyly ótpegenderge aıyppul salyný qaýpin arttyrady.

Resmı jaýap

Bul máselege qatysty Qyzylorda oblystyq kólik ınspeksıasynan túsinikteme aldyq. Inspeksıa ókilderiniń aıtýynsha, tehosmotr pýnktteriniń tapshylyǵy joq. Óńirde búgingi tańda tehosmotr operatorlaryna 9 ruqsat berilgen. Onyń 8-i jumys istep tur: Qyzylordada – 7 stasıonarlyq jáne 1 jyljymaly ortalyq, al Qazaly aýdanynda taǵy bir jyljymaly pýnkt qyzmet kórsetedi.

Ortalyqtardyń jumysyn toqtatý sebebi

Vedomstvo barlyq ortalyqtardyń demalyssyz jáne táýlik boıy jumys isteıtinin, kólikter aǵynynyń teń bólingenin málimdedi. Alaıda, sońǵy ýaqytta ózgerister bolǵany ras. Inspeksıanyń túsindirýinshe, ótken jyldan bastap tehosmotr operatorlaryna qoıylatyn talaptar qataıtylǵan. Buryn tek habarlama tártibi bolsa, endi ruqsat alý jáne talaptarǵa sáıkestigin rastaý qajet. 1 naýryzdan bastap bul rásimnen ótpegen stansıalar biryńǵaı aqparattyq júıeden ajyratyldy. Iaǵnı, olar endi tehosmotr júrgize almaıdy. Bul jaǵdaı bir mezgilde birneshe pýnkttiń jumysyn toqtatýyna sebep bolǵan.