InfoHub Logo

Qyzylordada 10 jasar Alınýr Rahym esimdi bala úsh jyl boıy uıqysyzdyq dertine shaldyqqan. Túnde nebári bir saǵat qana uıyqtaıtyn balanyń jaǵdaıy ata-anasyn qatty alańdatýda. Bul týraly Infohub.kz aqparat agenttigi habarlaıdy.

Balanyń anasy Aınash Qaıpbaevanyń aıtýynsha, ulynyń uıqysyzdyǵy kúnnen-kúnge asqynyp barady. «Ulym túnde múldem uıyqtamaıdy desem de bolady, tek bir saǵattaı ǵana kóz iledi. Men oǵan: «Uıyqtamadyń ǵoı, jalyqpadyń ba?» dep surasam, «Joq, mama, jalyqpadym» dep jaýap beredi. Ár tún biz úshin naǵyz azapqa aınaldy. Dárigerlerge aıtsam, senbeıdi», – deıdi anasy.

Dárigerlerdiń kómegi nátıje bermedi

Telearna málimetinshe, otbasy buǵan deıin birneshe ret dárigerlerge qaralǵan. Alaıda, barlyq tekserýler men taldaýlar jaqsy nátıje kórsetken. Mamandar balaǵa tynyshtandyratyn dáriler taǵaıyndaǵanymen, olardyń eshqandaı áseri bolmapty.

Balanyń ózi de qınalyp júr

Alınýrdyń ózi de uıqysyzdyqtyń saldarynan qatty qınalyp júrgenin aıtady. Kózi isinip, árdaıym uıqyly-oıaý júredi eken. «Men uıyqtaǵym keledi, biraq uıyqtaı almaımyn. Erte jatsam da, keshke deıin uıyqtaı almaımyn. Dáriler kómektespeıdi. Turǵanda basym aýyrady. Keıde uıyqtappyn dep oılaımyn, biraq saǵatqa qarasam, nebári 5-10 mınýt ótken bolady», – deıdi Alınýr Rahym.

Uıqynyń azdyǵy kognıtıvti buzylýlarǵa ákelýi múmkin

Sońǵy kezderi balanyń este saqtaý qabiletiniń nasharlaǵanyn anasy baıqaǵan. Mamandar muny sozylmaly uıqynyń azdyǵynyń saldary dep túsindiredi. «Balanyń uıqysy qanbaǵandyqtan, mundaı jaǵdaılar oryn alady. Bul kognıtıvti buzylýlarǵa, emosıonaldyq aýytqýlarǵa jáne bolashaqta fızıkalyq saldarlarǵa ákelýi múmkin», – deıdi balalar dárigeri-psıhıatr Marına Vıhnovskaıa.

Mamandar keshendi tekserýdi usynady

Mamandardyń pikirinshe, balany sebebin anyqtaý úshin shuǵyl túrde keshendi tekserýden ótkizý qajet. «Balalar nevropatologyna qaralý kerek, óıtkeni túnde uıyqtap jatqan kezdegi elektroensefalografıany jazyp alý qajet bolady. Nevrologıalyq jaǵdaıyn baqylaý kerek. Sheshim sol jerde qabyldanady», – deıdi dáriger-nevrolog Ásem Qasenova.

Buryn uıqysyzdyq kóbinese egde jastaǵy adamdarǵa tán dep sanalsa, qazirgi tańda mamandar muny balalarda jıi kezdestirip júr. Munyń basty sebepteriniń biri – smartfondarǵa shamadan tys táýeldilik ekeni aıtylady.