InfoHub Logo

Sońǵy kúnderi Facebook jelisinde taraǵan bir beınejazba qoǵam nazaryn ózine aýdardy. Vıdeoda bilim berý mekemesiniń basshysy jumys ornynda otyrǵan áıelmen jaqyn qarym-qatynas jasap turǵany kórinedi. Bul jaǵdaı jeli qoldanýshylary arasynda qyzý talqyǵa tústi.

Bul týraly Infohub.kz aqparat agenttigi habarlaıdy.

Jelidegi aqparattarǵa súıensek, oqıǵa Qyzylorda oblysy, Jańaqorǵan aýdanyndaǵy kolejderdiń birinde bolǵan degen boljam bar. Alaıda bul málimet áli resmı túrde rastalmady.

Quzyrly organdardan jaýap kútýde

Qoǵamda úlken rezonans týdyrǵanyna qaramastan, quzyrly organdar tarapynan ázirge naqty jaýap joq. Ásirese, Qyzylorda oblystyq bilim basqarmasynyń únsizdigi jurtshylyqtyń narazylyǵyn kúsheıtýde. Memlekettik organ úshin mundaı jaǵdaıda jedel ári naqty túsinikteme berý – mindet.

Basqarma basshysynyń jaýapkershiligi

Basqarmanyń únsizdigin túrli sebeptermen baılanystyryp jatqandar da bar. Keıbir jeli qoldanýshylary basqarmanyń baspasóz qyzmeti álsiregenin, tipti jaýapty mamannyń bolmaýy múmkin ekenin alǵa tartady.

Máseleniń mán-jaıyn suramaq bolyp, Jańaqorǵan aýdandyq ákimdigine habarlasqanymyzda, olar oqıǵa oryn alǵan mekemeniń aýdandyq bilim bólimine emes, tikeleı Qyzylorda oblystyq bilim basqarmasyna qaraıtynyn jetkizdi. Alaıda oblystyq bilim basqarmasymen baılanysý múmkin bolmady.

Eń basty suraq – basqarma basshysy Asqarbek Esjanov nege únsiz? Qoǵam talqylap jatqan máseleniń anyq-qanyǵyn aıtyp, ras-ótirigin ajyratyp beretin negizgi tulǵa dál ózi emes pe? Mundaı jaǵdaıda únsiz qalý – máseleni ýshyqtyra túspese, sheshpeıtini anyq.