InfoHub Logo

Referendým qarsańynda áleýmettik jelilerde saılaý jáshikterine búletenderdi jappaı tastaý týraly jalǵan beınerolıkter taralýda. Jalǵan aqparatqa qarsy is-qımyl ortalyǵy bul vıdeolarǵa qatysty túsinikteme berdi.

Bul týraly Infohub.kz aqparat agenttigi habarlaıdy.

Júrgizilgen taldaý nátıjesinde mundaı beınejazbalardyń basym bóligi basqa elderde jáne ártúrli ýaqytta túsirilgeni anyqtaldy. Keıbir vıdeolar naqty shyǵý tegi men mán-jaıy kórsetilmeı, qoıylymdyq nemese óńdelgen bolyp shyqty.

«Joǵalyp ketetin sıa» beınelengen rolık

Mysaly, «joǵalyp ketetin sıa» týraly beıne alǵash ret 2019 jyly ınternette paıda bolǵan. Bul materıal buǵan deıin Reseı, Ýkraına jáne Qyrǵyzstan elderinde birneshe ret jarıalanyp, keńinen taralǵan bolatyn.

«Al ózge materıaldardyń bir bóligi – osydan 10-15 jyl buryn jáne odan da erte ýaqytta jarıalanǵan beınejazbalar. Ortalyq barlyq onlaın-platformalarda olardyń nusqalaryn esepke alǵanda, 32 biregeı beınejazbany anyqtady», - delingen habarlamada.

Aqparattyq arandatýshylyqtyń maqsaty

Ortalyqtyń málimetinshe, mundaı materıaldardy paıdalaný – aqparattyq arandatýshylyq tehnologıalarynyń biri. Maqsat – daýys berý prosedýralary týraly burmalanǵan túsinik qalyptastyrý arqyly referendým qarsańynda qoǵamdaǵy senim deńgeıine nuqsan keltirý.

Referendým kúni jaqyndaǵan saıyn manıpýlásıalyq kontenttiń anaǵurlym kúrdeli túrleri, sonyń ishinde shynaıy oqıǵalardy nemese laýazymdy tulǵalardyń málimdemelerin ımıtasıalaıtyn dıpfeık-beıneler paıda bolýy múmkin dep boljanýda.

Ortalyq azamattardy mundaı jarıalanymdarǵa synı turǵydan qaraýǵa, aqparat kózderin muqıat tekserýge jáne rastalmaǵan materıaldardy taratpaýǵa shaqyrady.