InfoHub Logo

Elbasy Nursultan Nazarbaev Bilim jáne ǵylym mınıstri Erlan Saǵadıevti qabyldady, dep habarlaıdy Aqordanyń baspasóz qyzmeti.

Kezdesý barysynda Memleket basshysyna Bilim jáne ǵylym mınıstrliginiń 2016 jylǵy jumysynyń qorytyndylary jóninde esep berildi.

Nursultan Nazarbaev bilim jáne ǵylym júıesiniń aldaǵy reformalardy, Qazaqstan Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty joldaýyn iske asyrýdaǵy mańyzdy rólin atap ótti.

- Biz el ishinde de, sheteldik oqý oryndary qabyrǵasynda da kadrlar daıarlaý isi boıynsha aýqymdy jumystar júrgizdik. Úsh tilde bilim berýge, sıfrlyq oqytý ádisine kóship jatyrmyz. Bilim jáne ǵylym mınıstrligi aldynda bul salany odan ári damytýǵa baılanysty zor mindetter tur. Qajetti adam resýrstarynsyz joldaýda alǵa qoıylǵan mindetterdi oryndaý, sonyń ishinde tehnologıalyq jańǵyrýdy júzege asyrý, «Sıfrlyq Qazaqstan» memlekettik baǵdarlamasyn iske asyrý múmkin emes, - dedi Qazaqstan Prezıdenti.

E. Saǵadıev Memleket basshysyna bilim berýdiń jańartylǵan mazmundaǵy formatyn engizýge, bes kúndik oqý aptasyna kóshýge, bazalyq oqýlyqtar ázirleýge qatysty mınıstrlik júrgizip jatqan reformalar týraly baıandady.

Sońynda Nursultan Nazarbaev bilim berý júıesinde iske asyrylyp jatqan ózgeristerdiń nátıjelerin atap ótip, olardy aqparattyq turǵydan qoldaý máselelerine, sondaı-aq qoıylǵan mindetterdiń iske asyrylý qajettigine nazar aýdardy.

Kezdesý qorytyndysy boıynsha Elbasy birqatar tapsyrma berdi.

---