InfoHub Logo

Kárim degen mesher ózi jumysqa táýir jigit te bolsa, jýynyp, kirsiz kóılek kıip, taza júrýmen isi joq edi. Árkim aıtýshy edi:

— Saǵan ne boldy, Kárim, boıyńnan kirińdi aǵyzyp júrgenshe, jýynsań bolmaı ma? — dep.

— Qolym tımeıdi, — deýshi edi ol.

Sóıtip júrip, tulaboıyn shıqan qaptap jáne qotyr boldy. Bul kúıde qurysyp-tyrysyp jatqanynda, árkim suraıdy:

— Kárim, saǵan ne boldy? — dep.

Kárim aıtady eken:

— Kúnám úshin Qudaıdyń bir bergen sazaıy-daǵy, — dep.

Oǵan qarsy tanystary:

— Ras, Kárim, Qudaı-Taǵala taza júrmegen bylǵanysh kisini súımeıdi, tym bolmasa jumasyna bir monshaǵa túsip, ne bolmasa úıinde sabynmen jýynýdy ádet etseń, bu bálege dýshar bolmas ediń.

Sonymen, Kárimdi aýrý jatatyn úıge alyp baryp, taza jýyndyryp, taza kıim kıindirip, em qylǵan soń az ba, kóp pe jatyp jazyldy. Munan soń, Kárim bir zaýytqa baryp jaldanypty. Ózderińe de belgili shyǵar, zaýytta nárse boıaıtyn boıaýlardyń bári de ý bolady. Bir kúni qojasy Kárimge bir boıaýdy bylǵap qoı dep beripti. Bylǵap otyryp-otyryp, kádimgi úırengen qalybynsha, qolyn jýmastan baryp, tamaqqa otyryp nan jepti. Qolyndaǵy boıaýdyń juǵynynyń bári de jep otyrǵan nanyna jabysyp otyrǵanda, bir mezgilde Kárimniń ishi búrisip, aýyra bastapty. Árli-beri, olaı-bulaı aýnaqshyp, biraz jatyp, Kárim uzamaı-aq jan tapsyrypty. Álgi boıaý ý boıaý eken.

---