InfoHub Logo

1 sáýirden bastap Qazaqstanda kasa apparattarynyń eskirgen derekterdi berý hattamasy (2.0.2) qoldanystan shyǵyp, jańa (2.0.3) hattamasy iske qosyldy. Bul ózgerister bızneske jańa mindetter júktep, salyq organdaryna bıznestiń zańsyz áreketterin anyqtaýǵa múmkindik beredi.

Bul týraly Infohub.kz aqparat agenttigi habarlaıdy.

Jańa hattamadaǵy ózgerister

Jańa hattama boıynsha, árbir satylatyn taýar Ulttyq taýar kataloginde tirkelýi jáne onyń kody fıskaldyq chekte kórsetilýi kerek. Sonymen qatar, kasa apparatynyń geolokasıasy anyqtalady. Bul ásirese, bir saýda ornynda birneshe JSN boıynsha tirkelgen kasalardy paıdalanyp, bıznesti bólý (droblenıe) sıaqty zańsyz áreketterdi anyqtaýǵa baǵyttalǵan.

Eki túrli kasa, eki túrli jaǵdaı

Bıznes ıeleri eki túrli kasany qoldanady: fızıkalyq apparattar (mysaly, «Merkýrıı») jáne onlaın-kassalar (Nurkassa, ReKassa sıaqty baǵdarlamalyq jasaqtamalar). Baǵdarlamalyq kasalardyń hattamalary avtomatty túrde jańartylady. Al fızıkalyq kasalardy jańartý úshin kásipkerlerdiń ózderi servıs ortalyqtaryna júginip, shyǵyndalýyna týra keledi.

Shtraftar bar ma?

Jańa hattamany qoldanbaǵany nemese kasany jańartpaǵany úshin tikeleı aıyppul joq. Alaıda, kasa jumys istemeı, fıskaldyq chek berilmese nemese chek durys resimdelmese, ákimshilik quqyq buzýshylyq týraly kodekske sáıkes aıyppul salynady. Iaǵnı, eskirgen baǵdarlama saldarynan týyndaǵan buzýshylyqtar úshin jaýapkershilikke tartylýy múmkin.

Máseleni qalaı anyqtaýǵa bolady?

Eskirgen hattamasy bar kasa jumysyn jalǵastyra beredi, biraq derekter salyq organdaryna barmaıdy. Bul jaǵdaıdy anyqtaý birden bolmaıdy. Kásipkerler deklarasıa tapsyrǵan kezde nemese bank derekterimen salystyrý kezinde máseleni baıqaýy múmkin. Sondaı-aq, tutynýshylardyń shaǵymdary arqyly da anyqtalýy yqtımal. Memleket azamattardy chek bermegen saýda oryndary týraly habarlaǵany úshin yntalandyrady.

Qazir ne isteý kerek?

Mamandar baǵdarlamalyq kasalarǵa kóshýdi usynady, sebebi olardyń jańartýlary avtomatty túrde júredi. Fızıkalyq kasa qoldanatyn kásipkerlerge apparatty servıs ortalyǵyna aparyp, baǵdarlamanyń ózektiligin teksertý qajet. 1 sáýirden keıin jańartýdy keshiktirý – derekterdiń salyq organdaryna jetpeı, keıinnen túsinikteme berýge májbúr bolý qaýpin týdyrady.