InfoHub Logo

Aqtóbe oblysyndaǵy «Samara – Shymkent» halyqaralyq kólik dálizine kiretin «Aqtóbe – Qarabýtaq – Ulǵaısyn» avtojolyn jańǵyrtý jumystary jalǵasýda. Qazirgi tańda Hromtaý aýdanyndaǵy jol ýchaskesinde atqarylyp jatqan jumystardyń barysyn oblys ákimi Asqat Shaharov tekserip shyqty.

Bul týraly Infohub.kz aqparat agenttigi habarlaıdy.

Jol qurylysynyń barysy

Aqtóbe oblysynyń ákimi Asqat Shaharov Hromtaýǵa jumys sapary barysynda «Aqtóbe – Hromtaý» avtojolynyń 791-den 819-shy shaqyrymyna deıingi ýchaskesinde júrgizilip jatqan jańǵyrtý jumystarymen tanysty. Merdiger mekeme – «SP Sıne Mıdas Stroı» JSHS.

Merdiger uıym ókilderiniń habarlaýynsha, ótken jyly jańǵyrtýdyń birinshi kezeńi aıaqtalǵan soń, ýchaske tehnıkalyq rejımde ashylǵan. Qazirgi kezde joldyń qarama-qarsy betinde jumystar jalǵasyp, tómengi qabattaǵy jol jabyny tóselýde. Búgingi tańda trassanyń 28 shaqyrymynyń 17 shaqyrymynda jumystar aıaqtaldy. Bul kezeńdi jaz aılarynda bitirý josparlanýda.

Atqarylyp jatqan jumystar

«Nysanda jer jumystary, sý ótkizý qubyrlaryn ornatý, qorshaýlar men qardan qorǵaıtyn qalqalardy ornatýǵa daıyndyq jumystary, sondaı-aq sý burý naýalarynyń qurylysy júrip jatyr. Eki kópir men eki aspaly kópirdegi negizgi jumystar aıaqtalyp, qozǵalys ashyldy. Sondaı-aq, mal ótetin arnalar salyndy», – delingen ákimdik habarlamasynda.

Merdigerdiń málimetinshe, jańǵyrtý jumystaryna 349 birlik arnaıy tehnıka men 436 jumysshy jumyldyrylǵan. Qurylys materıaldary – qıyrshyq tas, bıtým jáne temirbeton buıymdary – tolyq kólemde qamtamasyz etilgen.

Jobanyń mańyzdylyǵy

Jalpy uzyndyǵy 262 shaqyrymdy quraıtyn «Aqtóbe – Qarabýtaq – Ulǵaısyn» avtojolyn jańǵyrtý jobasy jeti ýchaskege bólingen jáne 2024-2028 jyldarǵa arnalǵan. Bıylǵy jyly Yrǵyz baǵytynda da jumystardy bastaý kózdelgen.

Asqat Shaharov jobanyń óńir úshin strategıalyq mańyzdylyǵyn atap ótip, sapany joǵary deńgeıde saqtaı otyryp, jumys qarqynyn kúsheıtýdi tapsyrdy.

«Oblys turǵyndary zamanaýı jáne qaýipsiz tas joldyń ashylýyn kútýde. Jobany júzege asyrý jol qozǵalysy qaýipsizdigin arttyryp, kólik baılanysyn jaqsartyp, jergilikti turǵyndar men tranzıttik kólikter úshin qolaıly jaǵdaı jasaıdy. Bul úshin barlyq qajetti resýrstar bar, sondyqtan óndiristik prosesti utymdy uıymdastyryp, jumys sapasyn qamtamasyz etý mańyzdy», – dedi óńir basshysy.