InfoHub Logo

Ánshi Narkenje Serikbaeva áleýmettik jelidegi paraqshasynda ómir joly men ónerdegi talaı qıyndyqty bastan keshkenin jasyrmaı aıtyp, tyńdarmandarymen júrekjardy oı bólisti. Óner ıesiniń bul jazbasy kópshiliktiń qyzý talqylaýyna aınaldy.

Bul týraly Infohub.kz aqparat agenttigi habarlaıdy.

Ashyq minezdiń artyndaǵy jandar

Kópbalaly otbasynda ósken ánshi, óziniń minezi men baýyrmaldyǵyn ata-anasynyń tárbıesimen baılanystyrdy. Ol adamdarǵa degen senimin ómirlik ustanym etip alǵanyn aıtady.

«Ákem men anamnyń kenjesi, 11 perzentti kóp balaly otbasynyń erkesi boldym. Kópshilmin. Kópshiliktiń arasynda da erkelep ketetin bárin úıdegideı kóretinim bar. Adamdardy jatyrqamaı-aq kóńil qalpymmen qabyldaımyn. Ózgeni ózimdeı kórip, qolymdaǵy barymmen bólisip júrgenim – anamnyń tárbıesi», - deıdi Narkenje Serikbaeva.

Óner – ómirlik jol

Ánshi ónerge degen mahabbaty eshqashan sónbeıtinin atap ótti. Ol óziniń aq kóńildiligin keıbir adamdar ańqaýlyqqa balap, aldap ketken kezderi de bolǵanyn moıyndady.

«Syrt kózge kókirekteý kóringenimmen, ishteı óte aq kóńil, jumsaq adammyn negizi. Keıde erkeligimdi kótere almaıtyn adamdary da kezdestirem. Aq kóńildigimdi ańqaýlyq dep sanap, san soqtyryp júrgender az emes. Ómir bolǵan soń bárin kóredi ekensiń. Mende dos sanaýly ǵana. Satqyndyqty da kórdim. Betke aıtatyn minezimmen adamdarǵa keıde jaqpaı qalamyn. Syrttan sóılegennen góri betke aıtyp ta júre bergen jaqsy…», - dep tolǵanady ánshi.

Narkenje Serikbaeva ónerdi ómirlik serigi sanap, tyńdarmandaryna degen rızashylyǵyn bildirdi. «Ómirge ónermen keldim, sol óner dep ótem. Án – meniń ómirim. Án – ǵumyr, án – sapar, eldiń yqylasy máńgilik bolǵaı! Jaqsy adamdarym, tyńdarmandarym, tileýlesterim sizder aman bolyńyzdar!» - dep sózin qorytyndylady.

Jeli qoldanýshylary ánshiniń ashyqtyǵy men shynaıylyǵyn joǵary baǵalap, oǵan qoldaý bildirdi. Kópshilik ony júregi taza, qaısar ári úlgi bolarlyq tulǵa retinde sıpattaýda.