InfoHub Logo

Qazaqstan balalar zorlyq-zombylyǵynyń aldyn alý tájirıbesin taratýda donor elge aınaldy. Bul pikirdi búgin Ortalyq Azıa elderiniń jabyq mekemelerindegi balalarǵa qatysty zorlyq-zombylyqty boldyrmaý sımpozıýmynda tilshilerge suhbat bergen Qazaqstandaǵy adam quqyqtary jónindegi ýákil Asqar Shákirov málim etti.

«Bizderdi balalar sýısıdi oqıǵalarynyń oryn alýy, oqý mekemelerinde balalarǵa jasalatyn zorlyq faktileri alańdatady. Bul turǵyda Qazaqstan, ıaǵnı bizdiń memlekettik quqyq qorǵaý uıymdarymyz júıeli jumystar júrgizýde. Sońǵy jyldary bizde birqatar birlesken joba júzege asyryldy. Atap aıtqanda, IýNISEF-pen otbasydaǵy, mekteptegi jáne qoǵamdaǵy balalar problemasyn úsh deńgeıli zertteý júrgizildi. Osy oraıda buǵan deıin Qazaqstan ózge elderdiń jobalaryna nazar aýdaryp kelse, osy joba júzege asyrylǵannan keıin biz atalǵan tájirıbemizdi bólisý turǵysynda donorǵa aınaldyq desek te bolady», - dedi Shákirov.

Sonymen qatar ol arnaı júrgizilgen saýalnama málimetterin de jarıa etti. Oǵan sáıkes, jabyq mekemelerdegi pedagogterdiń 40 paıyzy balalarǵa qatysty kúsh qoldanǵany anyqtalǵan.

«Mekemelerdegi balalardyń quqyqtaryn qorǵaý máselesi barynsha ótkir. Óıtkeni, qoǵamnyń aıryqsha nazaryn talap etedi. Joǵaryda atap ótken jobalar barysynda biz bul máseleni zerdeledik. Eki jyl buryn atalǵan mekemelerde qandaı ba bir problemalar týraly másele kóterilmegen de edi. Degenmen, saýalnama  atalǵan mekemelerdiń suralǵan qyzmetkerleriniń 40 paıyzy tárbıelik shara retinde balalarǵa qol jumsaǵany belgili boldy», - dedi ókil.

Onyń sózine qaraǵanda, saýalnama kópdeńgeıli joba aıasynda úsh jyl boıy júrgizilgen.

---