InfoHub Logo

Saýsaqtar arqyly minez anyqtaý (test)
Mundaı testerdi kóbine psıhologıalyq trenıńterde oqýshylar men stýdentterge jasatady. Kishkentaı testten adamnyń bolmysyn sýrettep shyǵýǵa, árıne, bolmas, alaıda ózińiz jaıly kishkentaı maǵlumat alýǵa bolady.

1. Saýsaqtaryńyzdy bir - birimen aıqastyryńyz.
Eger oń qolyńyzdyń bas barmaǵy sol qolyńyzdyń bas barmaǵynyń ústinde jatsa, paraqqa «2» dep jazyńyz, eger sol qolyńyz ústide jatsa - «1».
2. Bir kózińizdi jumyp, kez kelgen nysanaǵa dáldep kózdeńiz.
Eger sol kózińiz ashyq qalsa, «1» sanyn jazyńyz, eger oń kózińiz ashyq qalsa - «2».
3. Qolyńyzdy keýdeńizge aıqastyryńyz, qaı qolyńyz ústide jatyr?
Eger sol qolyńyz saýsaqtary oń qolyńyzdyń ústinde jatsa, «1» sanyn jazyńyz, eger oń qolyńyz ústide jatsa - «2».
4. Kóldeneń shapalaqtańyz.
Eger sol qolyńyz ústide bolsa - «1», eger oń qolyńyz bolsa, onda «2».
Qorytyndysyn sandardyń ornalasý tártibi boıynsha anyqtańyz:
«2222» - (júz paıyz ońaqaı) – minezi turaqty, konservatızm, bireýlermen shıelenisýden, ursysýdan qashady.
«2221» - eń úlken kemshiligi – batylsyzdyq, tartynshaqtyq.
«2212» - óte ashyq, kez kelgen adammen til tabysyp ketedi.
«2111» - turaqsyzdyq, jaltaqtaǵysh, bireýdiń qoldaýy men pikirine táýeldi, ózine senip úırený kerek.
«2211» - mundaı úılesim kóp kezdese bermeıdi. Ashyq adamdar, jaqsy qarym - qatynas jasaıdy, ári minezderi jumsaq.
«2122» - bundaı adamdarda analıtıkalyq aqyl - oı júıesi qalyptasqan, minezi jumsaq. Bárine saqtyqpen qaraıdy, adamdarmen ózin salqynqandy ustaıdy.
«2121» - bul tirkes te sırek kezdesedi, qorǵansyzdyq, adamdardyń yqpalyna ushyrap turady.
«1112» - óte ásershil, qaıratty ári batyl adamdar.
«1222» - jıi kezdesetin minez. Ásershil, alaıda ómirlik suraqtardy sheshýde jigerlik pen batyldyq jetpeı jatady, basqalardyń yqpalyna kónip ketedi. Óte ashyq, adamdar ózderi tartylady.
«1221» - ásershil, batyldyq jetispeıdi, minezi jumsaq, ańǵal.
«1122» - dos jandy adamdar, biraq sonymen qatar ańǵal jáne qarapaıym. İsterin saralap, óz - ózin qazbalaýǵa qumar. Qyzyǵýshylyǵy kóp, biraq ýaqyty jete bermeıdi.
«1121» - adamdarǵa qatty senedi jáne minezi óte jumsaq. Kóbine shyǵarmashylyqqa beıim adamdar.
«1111» - (júz paıyz solaqaı) – kertartpa adamdar. Shyǵarmashylyqqa óte beıim. Kóptegen zattarǵa erekshe kózqaraspen qaraıdy. Óte ásershil, darashyldyq, egoızm basym. Qyńyr ári ózimshil, biraq bul olarǵa ómir súrýge kedergi emes.
«1212» - rýhy myqty adamdar. Birbetkeı dese de bolady, qoıǵan maqsattaryna jetedi.
«1211» - óz - ózin qazbalaýǵa qumar, tuıyq adamdar, kópke ashylmaıdy, biraq rýhy myqty, aldyna maqsat qoısa eshteńeden taısalmaıdy.
«2112» - jaıdary, erkin minezdi, dostardy tez tabady, tanysýy da ońaı jáne qyzyǵýshylyqtaryn da jıi aýystyrady.

Minezdi anyqtaý: Otyrys - turysqa baılanysty
«Kimniń kim ekenin qalaı túrden turatynynan, qalaı otyratynynan - aq bilýge bolady», - deıdi minez - qulyq tanýshy psıholog mamandar.
Otyrǵanda...
Tizeńizdi biriniń ústine birin qoıýǵa «áýes» bolsańyz:
Ózińizge ózińiz óte senimdisiz. Qandaı qıyndyqty da jeńe alamyn, maǵan aldyrmaıtyn, meniń shamam jetpeıtin esh nárse joq dep bilesiz. Shynynda da jumysta da, turmys - tirshilikte de siz nendeı tyǵyryqqa tirelseńiz de qınalmaı sheshesiz, buzyp - jaryp qalaıda shyǵatyn, bále - jalanyń bárin artta qaldyratyn kúsh - qaırat, teskindik tabasyz. Sizdiń taǵdyr - talaıyńyzǵa maqsat - muratyńyzǵa qol jetkizip, janyńyz jaılanyp ǵumyr keshý jazylǵan.
Eki aıaǵyńyzdy bir - birimen orap, matap «tastaýǵa» daǵdylansańyz:

Ózińizge - ózińizdiń senimińiz joq, ne nárseni de qolyńyzdan kelmeıtindeı, shama - sharqyńyz jetpeıtindeı kórip, taısaqtap, qorǵanshaqtaısyz da júresiz. Búgin sheshetin, búgin iske asyratyn sharýany erteńge qaldyrýdy «jan tynyshtyqtyń» bir joly sıaqty kóresiz. «Ajaldan basqanyń bári tezirek bolǵany jaqsy» degen qaǵıda sizge júrmeıdi. Birdeńelerge qol jetkizgińiz kelse shırańyz, batyldanyńyz, áıtpese bárinen qorqyp - úrkip, kejegeńiz keri kete berse, qamshynyń sabyndaı kelte ǵumyr ótedi de shyǵady.
Aıaqty aıqastyryp, alǵa sozyp jiberýdi ádet qylsańyz:

Minez - qulqyńyz óktem, mańaıyńyzdy ózińizdiń aıtqanyńyzben júrgizip - turǵyzǵyńyz keledi. Qashanda, qaı jer, qaı ortada da ózińiz basshy, ózgeler qosshy bolǵanyn qalaısyz. Basqalar da bar - aý demeı, aıaqty jambasyńyz jer ıiskedi degenshe aıqastyryp, aldyǵa «laqtyryp tastaıtynyńyz» da sol «menen ótkin kim bar» degen ishki óktem pıǵylyńyzdyń kórinisi. «Aldymen siz, sodan keıin ǵana biz» dep ózińizdi pir tutatyn orta bolsa, jurtpen til tabysyp, tirshilik etý siz úshin qıynnyń qıyny. Qadir - qasıetińiz asyp, mysyńyz basyp turmasa, kim «bul turǵanda, men bylaı turaıyn» deıdi... «Adamnyń kúni – adammen» bolǵasyn «Aıaz bı, álińdi bil» degendi biraýyq eske alǵan jón.

Eki tizeniń arasyn qosyp, tabanyńyzdy jerge tósep otyrsańyz:
Maǵan kim ne ister eken dep únemi qorǵanysta júretinińiz bolmasa, óz tarapyńyzdan bastama kóterýge, ara - tura bolsa da áldebir istiń basynda, tizgin ustap otyrýǵa joq adamsyz. Jurt ózińizdi sabyrly kóredi, biraq sizde odan góri tuıyqtyq, jasqanshaqtyq basym. Bireý betińizge jel bolyp tıdi degenshe renjip, meselińiz qaıtyp, jasyp qalasyz. Eshkimge qosylmaı saıaq, ózińizben ózińiz júretinińiz de sodan.

Tabannyń ushyn qosyp, óksheni alshaqtatyp otyrýǵa ádettenseńiz:
Kinámshil, shamshyl biraq batyldyqqa úsh qaınasa sorpasy qosylmaıtyn jansyz. Sizge qaı iste de bolady, ne bolmaıdy, jaqsy, ne jaman dep kesimdi pikir aıtýdan qıyn nárse joq. Kópten tanıtyn bireýlerińiz bolmasa, eshqandaı ortaǵa sińisip, bireýlermen emen - jarqyn aralasyp - quralasyp kete almaısyz. Oıyńyzdy da, boıyńyzdy da shıraq ustańyz, ózińizge jetpeı turǵan sol.